Shillong, Jymmang, 14: Haduh 126 ngut ki samla pule ki la iashim bynta ban thoh ia ka eksamin ba la pynlong da ka Khasi Students Union (KSU) na ka bynta ban ai jingkyrshan pule (Scholarship) ia ki khynnah kiba don ka jingthmu ban pule ia ka UPSC-CSE.
Na ki 160 ngut kiba la thep kyrteng, 126 ngut ki samla pule ki la iashim bynta ha kane ka eksamin ba la pynlong ha skulbah NEHU ha ka sngi Saitjaiñ kaba la sdang naduh ka por 1:00 baje haduh ka por 3:00 baje nohphai sngi.
Shwa ban pynsdang ia kane ka eksamin, u President ka KSU u samla Lambokstarwell Marngar u la ai mynsiem ia ki nongiakhun eksamin bad u la iathuh ba ka jingthmu jong ka seng haba pynlong ia kane ka eksamin ka long ba ka Seng kan ïoh ai jingkyrshan baibam ia ki samla kiba la shah jied hadien ba ki la pas ia kane ka eksamin.
U President u la pynpaw ruh ka jingbynniaw ha kaba iadei bad ka jingduna jong ophisar ki IAS, IPS bad kiwei kiwei kiba dei ki trai ri trai muluk haba ianujor bad kiwei ki jylla ha ka Thaiñ Shatei Lammihngi.
“Kane ka long kaei kaei kaba la pynsngewkhia shikatdei eh ia ka seng bad kumta ka seng ka la shim ia kane ka sienjam ban kyrshan ia kino kino ki paradoh parasnam kiba don jingthmu ban pyntbit ialade ha katei ka bynta,” u la ong.’
U President u la ong ruh ba kane kam dei ka jingjop hynrei ka dei ka jingsdang bad ha kajuh ka por u la kyntu ia ki nongiakhun ia kane ka eksamin ba lada ki shah jied kin dei ban long kiba dang kham trei shitom shuh shuh bad ban long kiba iaishah.
U la ai nuksa ruh da kaba pynkynmaw ia ki snem kiba la leit ha ka por ba ka seng ka la kitkhlieh ban kyrshan jingpule ia ki 40 ngut ki paradoh parasnam sha Hyderabad ha ki jingpule bapher bapher ha kaba kiba bun ki la pynlehnohei noh ia kane ka kabu ksiar namar ka jingalhia bad jingbym don ia ka mynsiem iakhun bad ka mynsiem iaishah.
Ia ka resol jong kane ka UPSC-CSE Scholarship Examination ba la pynlong da ka Seng yn sa pynbna paidbah lyngba ka website jong ka KSU ha ki taiew ban wan.
Na ka liang jong ka Education Cell ka KSU lyngba une u kyrwoh, ka ai khublei nyngkong ia baroh ki nongiakhun ia ka eksamin, ia ki nongpyniaid jong skulbah North Eastern Hill University (NEHU) kiba la ai kylluid mynsiem ban pyndonkam ia ki Cluster Class Room, ia ki Research Scholars kiba la shim ia ka bynta kum ki Invigilators, ki nonghikai, ki dkhot Seng bad NEHU Unit kiba la trei borbah ban pynbit pynbiang khnang ban iaid beit iaid ryntih kane ka eksamin.
Ka Education Cell ka ai khublei kyrpang ruh ia kiba la noh synniang na ka bynta ka Scholarship bad kyllum ia baroh kiba lah don bynta ha kane ka sienjam.
