Da ka jingai jinghikai ba sngi pynlong ka Mawdem Presbytery halor ka kam rep syieng bad rep Tit

Nongpoh, Naiwieng 22: Kum shi bynta ban ai jinghikai sha ki nongrep halor ki buit rep syiang bad rep Tit thymmai ban myntoi ki nongrep, ka Mawdem Presbytery ha ka 21 tarik u Naiwieng 2023 ka la pynlong da ka prokram ai jinghikai ba shisngi ha Patharkhmah na ka bynta ki nongrep ba kin tip kham bha halor ka buit rep syiang bad rep Tit.
Ïa kane ka prorkam ai jinghikai la pynlong ha Dorbar Hall ka Western Ri Bhoi Dorbar Welfare and Social Organization ha kaba la wan ban shim bynta da ki nongrep na ka thaiñ Western Ri Bhoi.
Kane ka prokram ai jinghikai ka Mawdem Presbytery ka dei ruh kaba la kyrshan bad ïa trei lang bad ka District Training Centre, East Khasi Hills District, Shillong.
Ha kane ka prorkam ki ar ngut ki riew shemphang ha katei ka kam rep kiba kynthup ïa u Blueming Suphai, u la ai jingkren halor ki buit thymmai ban rep syieng, kaba ban ai jingmyntoi ïa ki noingrep bad ha ka kam rep Tit pat la ai jinghikai da u Bah Kit Kharpran bad u Bah K. Ryntathiang ha ka jingdon ryngkat ruh u Tymmen Basan P. Rani bad kiwei kiwei ki nongïalam na ka Mawdem Presbytery.
Ha kane ka sngi, na ka liang ki bor pynïaid ka Mawdem Presbytery lyngba u Tbn. P. Rani, ki la ai khublei kyrpang naduh kitei ki nongwan ai jinghikai sha ki nongrep bad kumjuh ruh sha ki nongrep kiba la wan ban shim bynta, namar da ka jingpynlong kum kine ki jaid prokram ai jinghikai kan ai shisha ka jingmyntoi ïa kito ki nongrep syieng bad ruh ki nongrep tit ba kin tip katkum ka juk ba thymmai, kaba kyntiew ïa ka ioh ka kot jong ki lyngba ki kam rep ki kam riang.