Jowai, Naiwieng 22: Ka ophis u District Sports Officer, West Jaiñtia Hills ha ryngkat ka jingïatrelang bad ka West Jaiñtia District Sports Association mynta ka sngi kila pynkut ïa ka Open Volley Ball Tournament-2023 ha madan Biar ka Blai ha Mission Compound, Jowai.
Ïa kane ka lympung la sdang ïa ka naduh ka 20 tarik u Naiwieng ha kaba la wan ban ïashim bynta da ki 8 tylli ki team kynthup ïa ka Lion Mission Compound Sports and Youth Affairs, Khimusniang, Yakrehlang SC Nangbah, Madankynsaw Mowkyndeng Knorsyiem, Kiang Nangbah Govt. College, Spikers, Chullai Brothers Chutwakhu bad ka Lion Mission Compound Dorbar Shnong.
Ki ar tylli ki kynhun kiba la poi sha ka jingïakhun phainal ban ïoh rah ïa ka nam lahduh mynta ka sngi ki long ka Yakrehlang SC Nangbah pyrshah ïa ka Madankynsaw Mowkyndeng Knorsyiem. Ha kaba naka liang ka kynhun jong ka Madankynsaw Mowkyndeng Knorsyiem kala jop da 25/15 bad 25/17 point ïaka Yakrehlang SC Nangbah.
Ha kane ka sngi la wan ban sakhi lang naduh u ma EMH Passah, Working President WJDSA kum u kongsan, u ma Khroobok Passah, DSO, West Jaiñtia Hills, u Patrick Lamare, Vice-President WJDSA, u Lammat-O Laloo, General Secretary WJDSA, ma P. Khyriem, Waheh Chnong Lion Mission Compound bad kiwei de.
U EMH Passah haba ai jingkren ula ong ka West Jaiñtia District Sports Association ka don ka thong ban pynkiew ïaka kam Sports hapoh ka hapoh ka District hi baroh kawei, da kaba kyntu ïa ki dong bad ki shnong ba kin wan shakhmat ban ïashim bynta lang ha ki jingïalehkai bapher bapher ba pynlong da ka WJDSA.
U Khroobok Passah, DSO-West Jaiñtia Hills ula ong ka jingpynlong ïa kane ka lympung ka long shi bynta ban pynmih pyrthei ïa ki samla ka District kiba don ka sap ka phong hakum kane ka jait jingïalehkai bad ba kin ïoh mihkhmat sha ka Meghalaya Games ka ban long naduh ka 15 tarik Kyllalyngkot, 2024.
La pynsngew ïa kane ka lympung Open Volley Ball Tournament yn pynlong ïa ka manla u snem ha kaba kino kino ki shnong ne ki kynhun ki lah ban wan ïashim bynta lang.
