Ngi ju ïoh sngewbha ïa ka jingkren bad ka jingong ba ka Jaidbynriew ka wan ba nyngkong bad ka niam ka wan hadien: kaba mut ka Jaidbynriew ka wan nyngkong bad ka jingngeit Blei ne ka niam ka wan hadien. Hynrei hato kane ka mut mo ban ong ba ka Jaidbynriew ka wan ba nyngkong bad U Blei u wan hadien? Em ngim tharai kan long kumta hynrei kane ka ktien ka long namar ba wat la ki briew ki don ha la ki jong ki jong ki jingngeit niam bad lah ban ïohi ïa kata hynrei ym lah pat ban ïohi ïa u Blei ha ki. Hooid kane ka long kaba shisha bad wat bun napdeng jong ki khristan ruh la ïohi ba kim da shai bha ha kaba ïadei bad kane ka phang namar ba ki don kiba ym treh shuh ban kren ei ei ha kaba ïadei bad ka jaidbynriew bad ki don pat kiba duwai ba U Blei un ai bor ha ki ban kin lah ban ïaleh pyrshah ïa ki jingeh da ka bor briew.
Haba kren shaphang jong ka jaidbynriew bad ki jingeh kiba bun kiba ka ïakynduh ka long shisha kaba eh ban pyrkhat namar ba ym lah ban lait na kaba hap ban ïaleh pyrshah ïa ki jingwan leh donbor jong ki briew kiba nabar ne ki kam bad ki jingtrei jong ka sorkar kiba ktah ïa ki trai shnong kiba dei ka doh ka snam jong ka Jaidbynriew. Ban ïaleh pyrshah ïa ki jingeh la donkam ïa ki jingïakhih kiba bun jait. Lah da ki phew snem ngi la ïohi ïa ki jingiakhih kiba har rukom ba ïadei bad ka ri bad ka Jaidbynriew. Kawei na ki jingïakhih kaba ïaineh haduh mynta ka dei ka jingïakhih pyrshah ïa ka jingwantuid kyrthep jong kiwei pat ki jaidbynriew heh paid sha kane ka Bri u Hynñiewtrep kaba la ktah ïa ka imlang sahlang jong ki trai jaka trai muluk.
Kane ka jingjia jong ka jingïakhih kha kane ka kynti kaba mynta ka long ban pyrshah ïa ka jingthmu jong ka sorkar India ban pyntreikam ïa ka Citizen Ammendment Act (CAA) bad ban wanrah pynïoh noh ïa ka Inner Line Permit (ILP) sha kane ka Jylla Meghalaya. Kane ka jingïakhih kam shym la ktah tang ha kane ka jylla Meghalaya ne ha ki bynta jong ri Khasi hynrei ka la ktah ha kylleng ki bynta bapher bapher jong ka ri India bad wat ha kane ka thaiñ shatei lam mihngi ruh. Ngim lah ban len ïa ka jingshisha ba kine ki jingïakhih ki ktah shibun eh, hynrei kaba khamktah kan long lada ym lah ban teh lakam ai katei ka jingpynlong aiñ jong ka sorkar pdeng ban kdup ïa ki khar poi ei kiba bun jait sha kane ka ri India bad khamtam sha kane ka jylla Meghalya kaba shong ba sah da ki jaidbynriew Khasi rit paid ba tang shi troh haba ïanujor bad kiwei pat ki jaidbyrniew heh paid.
Haba peit sha kane ka jingïaleh kaba don ha khmat jong ka jaidbynriew, ngi ïohi ba hadien jong ka jingïalang ba la pynlong da ki Sengbhalang ha ka shnong Ichamati hynnin ka sngi, ka la mih pynban ka jingïaumsnam ha kaba ka mynsiem ba kordor jong uwei u samla Khasi ka la duh noh ei. Shisha kino kino ki jingïakhih kim lait satia na ka dor kaba ban khia wat haduh ban duh ei ïa la ka jong ka jingim. Hadien jong kane la ïohi ruh ia ki jingjia kiba jia ha ka nongbah Shillong kiba la bud bad ngim tip sa kiei ki ban dang jia nangne shakhmat.
Kumta ka jingkylli ka long hato ki Khristan kiba dei ki Para Khasi Khara kaei ka kamram jong ki ban synniang sha kaba kum kane ka jingïaleh, hato ka dei mo ban shu ïa sngap jar? Em ym lah ban len ban ïohi ia ki kynhun Balang Khristan ruh da ka lynti jong ka jingngeit ki la ïanoh synniang da ka jingduwai bad ka jingïakynduh lang bapher bapher ban duwai na ka bynta ka ri bad ka Jaidbynriew. Hynrei kaei kaba mut ban ong hangne kam long ban shu kut noh tang ha kaba ïakynduh lang bad ïaduwai kumtei ha ki kynhun, hynrei ka dei ka kamram jong iwei pa iwei i bangeit Khristan ban buh kyrpang ha ka jingduwai na ka bynta kane ka Jaidbynriew Hynniewtrep.
Kum ki Khristan kim dei ban klet ba ka jingïaleh ne ka thma jong ki leh ka kham eh shibun namar ba kim ïaleh pyrshah ïa ka snam bad ka doh kaba lah ban ïohi, hynrei pyrshah ïa ki mynsiem bymman bad ki bor ka jingdum kiba long ka daw jong baroh ka jingbymshongsuk shongsaiñ ha ka ri bad ka Jaidbynriew. Ka Baibl ka kren shai bad ong ba lada kita ki briew kiba la khot da ka kyrteng jong U Blei kin pynrit ïalade bad duwai bad phai noh na ki lynti bymman jong ki, U Blei u ong un sngew ïa ki na bneng bad un pynkhiah ïa ka ri jong ki ( 2 khronikl 7:14). Shisha ka jingduwai jong kiba ngeit ka lah shibun bad kan wanrah ïa ka jingïaid beit jong ka jingïakhih kaba long kat kum ka riti ka dustur jong ka rï bad u Blei un ïoh ban ktah ïa ka bor jong ki nongsynshar ka ri ban leh ïa kaba donkam baroh.
