Shillong, Naiwieng, 21: Ka Sorkar Jylla ha ka sngi Baar ka la rai ban khot da ka jingïalang ïa ki kynhun bapher bapher bad ïa ki Rangbah Shnong ban ïathir ïatai sani bha ha kaba ïadei bad ka jingthmu ban ïada ïa ka tyllong um ha Wahkdait, Laitkor bad ïa ka wah Umkhen.
Ïa kane ka rai la shim ha ka jingïalang ba la pynïaid da u Myntri Rangbah ka Jylla u Conrad K Sangma ha ryngkat ka jingdonlang jong u Myntri ka tnat PHE u Marcuise N. Marak bad u Myntri ka tnat Water Resources u Bah Comingone Ymbon.
Ha ka jingïakren bad ki lad pathai khubor, u Marcuise N. Marak u la ïathuh ba la pynlong ïa ka jingïalang bad ka tnat PHE, Water Resources bad ka tnat Forest ha kaba ïadei bad ka jingthmu bad ka Umkhen Water Supply Scheme (UWSS) bad ka ban ïada ïa ka tyllong um ha Wahkdait, Laitkor.
U la pyntip ba u Myntri ka tnat Water Resources u ladep sorjamin ïa ka tyllong um dang shen bad lap ba kane ka tyllong um ka la shah ktah na ka jingtih shyiap, tih maw bad kiwei kiwei.
“Na kata ka daw, u Myntri Rangbah u la lum ïa ka jingïalang ki tnat bapher bapher bad ha ka jingïalang la shim ïa ka rai ban lum jingïalang ïa baroh ki kynhun da ka Deputy Commissioner. Ka DC kan shimti ban khot ïa ka jingïalang jong ki kynhun bapher bapher bapher kynthup ruh ïa ki briew kiba ju im kamai jakpoh da ka kam tih maw bad kynthup ruh ïa ki Rangbah Shnong,” u la ong.
“Katkum ki kyndon jong ka tnat Forest bad ka Water Resources, ka jingïada ka dei ka bynta banyngkong eh ban shim ha ka jingïalang ka ban sa long bad ki kynhun bapher bapher bad ki Rangbah Shnong bad ïa ka rai yn sa shim ynda la long ka jingïalang,” la ïathuh u Marak.
Haba pynpaw ïa ka jingdonkam ban ïada ïa ki um ki wah bad ki tyllong um, u Marak u la ong, “ngi donkam ban ïada ïa ki wah bad ïa ki tyllong um hynrei lym kumta ngin sa ïakynduh jingeh ha ki sngi ki ban sa wan. Ngi donkam ban shim ïa ki lad ki lynti katba ngi lah ei, kumno ngin leh, ngim lah ban shu phai lyndet ïa ki paidbah, ngi hap ban ïasyllok bad ban ïakren da kaba pynsngewthuh ïa ki, kumno ban ïaid shakhmat bad ban shim ïa ki lad ki lynti hadien ka jingïalang.”
Halor ka jingkylli, hato ka Sorkar kan thaw neem da kiwei ki lad ki lynti na ka bynta ki paidbah kiba im jakpoh na ka kam tih maw, u Myntri u la ong, tang shu dep ka jingbishar bniah, kin sa tip kiei ki lad ki lynti ban leh halor kane.
“Haoid, ka don ka Catchment Area Protection Act. Ngi dang pyrshang ban wad ïa ki lad ki lynti da kaba ïasyllok bad ki kynhun bapher bapher, ban pynsngewthuh ïa ki bad ngin sa lah ban shim ïa ka rai,” u la bynrap.
