Shillong, Naiwieng 21: Ka Myntri ka tnat ka koit ka khiah ka Kong Ampareen Lyngdoh mynta ka sngi Ba-ar ka la ïamir jingmut bad u Myntri Rangbah ka jylla u Conrad K Sangma lem bad ki ophisar jongka tnad halor ki mat jingdawa jong ki ASHA shwa ban ïa kynduh iaki lashai ka sngi.
Ka la ïathuh ba ka dei ka kamram jong ka ban ïakren , ïasyllok bad ïamir jingmut bad u Myntri Rangbah bad kiwei ophisar halor ki rai ban shim na ka bynta ki ASHA hapoh ka Jylla.
“Hashuwa ka jingïalang bad ki ASHA lashai ka sngi, nga la ïakren bad u Myntri Rangbah bad kiwei ophisar jong ki tnat bapher bapher na ka bynta ban shim ki rai kiba biang tam na ka bynta ki ASHA kiba long kiba donkam bha ïa ngi” la ong Kong Ampareen.
“Ngi la shong jingïalang bad nga la long ba la pynkhreh ban kynduh ïa ki ASHA bad ban shim rai ka ban nym ïatyngkhuh bad ka bha ka miat jong ki” kala ong
Ka koit ka khih ha ki 7000 tylli ki shnong ka la shah ktah namar ka jingïakhih ki ASHA hapoh ka shatri Meghalaya Accredited Social Health Activist Workers Union (MAWU) ka ba la neh mynta palat 16 sngi.
Ki nongtrei ASHA ki la rai ban bteng ïaka jingïakhih da kaba shong kyllaiñmyngngor hakhmat Secretariat naduh 27 tarik mynta u bnai halor ka jingmynthi ka Sorkar ban kyntiew ïa ka bainong sha ka T.5000.
Ka Kong Ampareen ka la kular da ka ba ong “Ka Sorkar ka don ban pynurlong ïa ki mat jingdawa, kaba ka lah”.
“Namar kane ka jingïalang bad ki ASHA lashai ka sngi donkam ban sngewthuh, ka rai kaba ka Sorkar ka lah ban leh. Donkam ban tip ba lada sngap ïa kawei ka kynhun, kiwei ki kynhun kin nym wan ban dawa. Ngi dei ka Sorkar ka ba sngap, ngin sngap kaei ka ba phi ong bad ngin ong ruh kaei ka ba phi dei ban leh” kala ong.
Ka Kong Ampareen kala kyntu ïa ki ASHA ban kiar ban mih sha surok namar ïa ki jingdawa ym lah ban pynurlong ha surok.
“Wat mih sha surok, ka surok kam lah ban pynurlong ïa ki jingdawa. wan sha ka Sorkar, kan sngap, ngi don hangne ban sngap” kala ong.
Haba kyntait ban kular eiei, ka Myntri kala ong “Nga kren biang bad ki ASHA ki long kiba donkam bha, ngim kwah ban pynduh ïaki”.
“Daka ba burom ïa ki ASHA, nga lah wad bniah (homework) namar ym lah ban leit sha ka jingïalang khlem pynkhreh. Hadien ba la dep ban pynkhreh ngan leit sha ka jingïalang ban lah ban jubab ïa ki” kala ong.
