Hato yn pynjlan sa 6 bnai ne shi snem ïa ka elekshon District Council

Shillong, Naiwieng 19 : Ka jingbym khih khohreh jong ki kyrtong ba thmu aireng ha kane ka elekshon MDC ha ki ar tylli ki district council kata ha KHADC bad kumjuh ha JHADC ka dei namar ki ngeit ha ka khubor kaba saphrïang kylleng ba ka elekshon MDC kan ym pat long ha u Lber ne Rymphang jong u snem ban wan.
Kumta halor kane, na ka liang u Mawphor u la ïoh ban ïa kren bad katto katne ki riewshemphang halor ka sainpyrthei kiba la pynpaw ïa la ka jong ka jingsngew bad kaei kaba ki ïohi halor ka jingbym pat khih khohreh jong ki kyrtong MDC ban leit pynkhreh na bynta ka elekshon.
“Ha ka elekshon ba la dep phi la ïohi ba shisnem shwa ka elekshon ki kyrtong khamtam ki sitting MDC ki la bunkam ha ki constituency jong ki. Hynrei mynta pat jar jar watla ka snem elekshon ka sah sa tang 4 bnai ei ei hynrei ym don pat mano mano ba khih lynga. Kane hi kadei ka dak ba ka elekshon imat ka dang jngai,” ong uwei na ki MLA ba rim ka jylla.
Khlem da kwah ban pynpaw kyrteng utei u rangbah ba la bat ruh kum u Myntri sorkar ka jylla ha ki snem ba la dep u la ong ba namarba ka elekshon MDC kam hap ka Election Commission jong ka Ri kumta kano kano ka lah ban long katkum ka election rule jong ka KHADC bad ba ka sorkar jylla ruh ka don la ka bynta halor kane.
Shuh shuh la ong ba katkum ka 1st Proviso jong ka Sub Para (6A) jong ka Para 2 jong ka Sixth Schedule ka shah ïa ka Council ban pynjlan ïa ka elekshon lada don ka nongrim kaba biang.
Nalorkata haba ïoh ban ïa kren bad uwei u riewshemphang u la ïathuh ba ka jingdon mynta ïa ka jingpynbeit thymmai ïa ki constituency ha u pud u sam jong ka KHADC ka lah ban pynjlan ïa ka elekshon da katto katne bnai lada jia ba ka Delimitation Committee kam lah ban pyndep ïa ka kam ha ka por kaba biang.
“Khlem pep ka delimitation committee kan ym lah ban leh kyrkieh kat ïa kane ka kam bad ka donkam ban leh sani jai ryngkat ka jingïaphylliew jingmut bad ki paidbah. Hynrei lada jia pat ba ka Committee ka lah ban aiti ïa ka report ha ka por ba biang lehse ka elekshon kan long kumba ju long,” u la ong.
Halor kane kajuh ka bynta la ïohi ruh ba dang shen ka Delimitation committee jong ka KHADC ka la pynpaw ba kan pynlong ïa ka jingïalang ba kyrpang ha ki 23 tylli ki constituency na ka bynta ban sngap ïa ka jingai jingmut ki paidbah bad kane ka long shi bynta na ka jingpynkhreh ban phiah ïa ki constituency ha shwa ban long ka elekshon MDC ha u snem ban wan.
Kane ka jingïalang ban sngap ïa ki jingai jingmut bad ki jingkren jong ki paidbah ha ki 23 tylli ki constituency kan sdang naduh ka 21 tarik mynta u bnai bad kan kut haduh ka 15 tarik Nohprah.
Kumta haba ïadei bad ka kam jong ka Delimitation Committe, don pat ki riewrangbah ba pynpaw lada jia ba kam lah ban pyndep ha ka por ba biang, na ka liang ka Executive Committee kam don lad da kumwei pat hynrei ka hap ban pynsngew ha u Lat.
“Ïa kane ruh lada u Lat u sngew ïahap u lah ban pynjlan ïa ka elekshon da ka jingthmu ban pynlong jingjied nongmihkhmat hadien ka jingpynbeit thymmai ïa ki constituency,” la pynpaw sa uwei u Rangbah uba bat ruh kum u nongïalam ba hakhmat ha kawei ka seng saiñpyrthei.
Katkum ka jingong jong, ha ki snem ba la dep ïa ka elekshon MDC ha rilum Garo la pynjlan na ka daw ka jingdon ka soskular kren ïasuk bad kawei ka kynhun bad dei naduh katei ka por ïa ka elekshon ha KHADC bad ha KHADC ka la ïapher noh bad ka elekshon ha GHADC.
“Hangne ruh ka don ka nongrim ba ka lah ban long lang noh ha kajuh ka por ïa ka elekshon la ka long naduh KHADC, JHADC bad GHADC da kaba buh noh ïa ka por pdeng kaban ïa beit lang khnang ba nangne shakhmat kan long noh ha kajuh ka por baroh lai tylli.
La ong ruh ba lada jia ba ha KHADC hap ban pynjlan ïa ka elekshon, ïa kane ruh hap ban leh lang ha JHADC namar kam long kaba ïahap ban leh la ka jong ka jong ka elekshon ïa ki lai tylli district council.
Kumta na ka liang kitei ki riewshemphang ki pynpaw ba kitei ki nongrim ki pynpaw ba ka jingjarjar ki MDC ban leit ïalap elekshon ka don ka daw ha lyndet bad kata ka long ba ka elekshon imat kan long kham slem.
La ïohi ruh ba dang shen u Myntri Rangbah ka jylla u Conrad K Sangma ula ong ba ka sorkar jylla kala pynïaid shakhmat ïa ki kam ki jam naka bynta ban pynlong ïaka elekshon MDC ha Khasi Hills Autonomous District Council (KHADC) bad Jaintia Hills Autonomous District Council (JHADC).
“Ki kam ki jam kila ïaid shakhmat bad ngi la ïaid katkum ka lynti kaba dei ban ïaid, kumta ngin sa peit haba ngi ïoh ïa kano kano ka jingpyntip na ka tnad kaba dei khmih, ngin sa shim ïa ka rai ha kaba ïadei bad ka jingbuh ïa ki tarik bad kiwei kiwei,” u la ong.
Halor ka jingsaphriang ba lah ban pynjlan ïaka elekshon jong ka KHADC bad GHADC namar ka jingsahteng ban pynkylla ïa ki kyndon jong ka Sixth Schedule jong ka riti synshar ka ri, u Myntri Rangbah ula ong ba haduh mynta um pat ïoh jingtip eiei bad um pat ïoh ïa kano kano ka jingthoh ruh.
“Tad haduh ba la pynpoi da ka jingthoh sha bad sha u Myntri u ba khmih ïa ka tnad District Council Affairs ngin sa lah ban kren eiei halor katei ka bynta,” bynrap biang u Myntri Rangbah.