Shillong, Naiwieng, 18: U MLA jong ka United Democratic Party (UPD) na West Shillong Constituency Bah Paul Lyngdoh uba long ruh u Myntri ka Sorkar Jylla bad kajuh ka por kum u MDC jong ka Jaïaw Constituency ha ka sngi Saitjaiñ u la kren da kaba shai ba um don jingmut satia ban ïakhun ïa ka elekshon Lok Sabha na Shillong Parliamentary Seat, ka ban sa long ha u snem ban wan.
Ha ka jingïakren bad ki lad pathai khubor u Bah Paul Lyngdoh u la pynpaw ba ki briew kiba don ïa ka jingthmu ban ïakhun ïa ka election Lok Sabha na ka tiket jong ka UDP ki dei ban wan shakhmat ban pynsngew bad ban bud ryntih ïa ki jingbthah jong ka party.
“Kam dei eh shaphang ka jingkwah jong nga ne ka jingkwah jong kiwei kiwei hynrei ka dei tang ka jinglum jingtip jong ka party. Kaba ngi lah ban leh ka long ban bud ïa ki kyndon treikam ba kino kino kiba don jingmut (ban ïakhun ïa ka elekshon Lok Sabha) ki lah ban wan shakhmat ban ai ïa ka aplikeshon jong ki,” la ong u Bah Paul.
“Na ka liang jong nga hi shimet hadien ba nga la shimti kum u MLA bad kum u Myntri Sorkar bad ha kajuh ka por kum u MDC kine ki dei ki lai tylli ki kam kiba khia bha bad ngan ym don jingmut ban leit shakhmat. Ki dang don shuh shuh ki riewrangbah kiba la pynpaw ïa ka jingangnud ba kin mih shakhmat bad nga shim ïa kata bad nga ngeit ha ka jingïatreilang ngi donkam sa kiwei de ki ban mih lang shakhmat ban pynkhlaiñ lang ïa ka jingsynshar bad ka jingtreikam jong ka party hapoh Jylla bad ha District Council,” la pynshai u Bah Paul.
Haba kylli, u la ong, “kam dei ba nga kynran dien ne tur shakhmat namar nga khlem don hi ruh ha ka madan. Nga sngew ba kaba bha eh ïa ngi ka long ban jied ïa kito kiba la pynpaw ïa ka jingangnud bad kiba la pynpaw shakhmat bad (ka party hi kan sa) jied ïa kiba kham kynsai tam.”
Haduh mynta hi, kiba la paw kyrteng ban pan tiket na ka UDP ban aireng ha kane ka elekshon ki long u President ba la shongthait jong ka Hynñiewtrep Youths Council (HYC) u Bah Robert June Kharjahrin bad u President jong ka Khasi Author Society u Dr. DRL Nonglait.
Dang shen ka Central Executive Committee (CEC) jong ka United Democratic Paty (UDP) ba la khlieh da u President u Bah Metbah Lyngdoh ka la shim ïa ka rai ban bynshet ha ka State Election Committee (SEC) jong ka Party ban pyrkhat ha kaba ïadei bad ka jingshim rai halor ki kyrtong ban pynïakhun na Shillong Parliamentary Seat bad na Tura Parliamentary Seat.
Ka UDP bad ka HSPDP kiba ïatreilang hapoh ka shatri jong ka Regional Democratic Alliance (RDA) dang shen ki la pynthymmai ïa ka jingïateh kular ban ïatreilang ha ka Elekshon Lok Sabha khnang ban sei tang uwei u kyrtong monlang jong ka RDA ban pynïakhun na Shillong Parliamentary Seat.
Ïa mynta, u Bah Vincent H. Pala u dei u MP ka Congress uba mihkhmat ïa ka Shillong Seat, katba ka Agatha K. Sangma ka dei ka MP jong ka NPP kaba mihkhmat ïa ka Tura Seat sha Lok Sabha.
