Shillong, Naiwieng, 18: Ka kynhun Pulit Anti-Narcotic Task Force (ANTF) jong ka East Khasi Hills District ha ka sngi Saitjaiñ ki la ïohkem ïa uwei u briew na kawei ka Bos ha ka shnong Mawryngkneng kaba dang wan na Silchar.
Ha ka jingtalasi ïa une u briew, ki Pulit ANTF ki la ïoh ban kurup kawei ka Mobile Phone, kawei ka pla rongïong bad 17 tylli ki synduk ba la thep ïa u drok Heroin uba don ka jingkhia 235.77 gram, la ong u kyrwoh ba la phah da u Superintendent of Police (City) East Khasi Hills Bah Vivek Syiem.
Halor kane ka jingïoh kem jong ki Pulit ïa une u snar khaïi drok, u Conrad Kongkal Sangma uba long u Myntri Rangbah jong ka Jylla u la ai khublei bad ai jingïaroh lyngba ka rynsan Social Media ïa ki Pulit kiba la ïoh ban kurup ïa u drok uba shongdor 2 klur tyngka.
“Ka jingkhublei ïa ki Pulit ka East Khasi Hills kiba la ïoh kurup ïa u drok uba shongdor kumba T.2 klur na u snar nongkhaïi drok ha Mawryngkneng mynta ka sngi. Hapdeng ki jingtrei shitom jong ngi ban pynpaw ïa ka dur jong ki kam jngohkai pyrthei ha ka Jylla Meghalaya lyngba ka tamasa Cherry Blossom, kine ki snar nongkhaïi ki thmu ban pynhiar dor pynban ïa ka burom jong ka jylla jong ngi,” la ong u Myntri Rangbah ha rynsan X.
“Nga ïaroh ïa ka jingaiti lut ki Pulit hapoh ka jingïalam jong u DGP u Dr. LR Bishnoi. Ka Sorkar jong ngi ka buh hakhmat ïa ka thong ban ïakhun pyrshah ïa ka jingkhaïi drok,” u la bynrap.
