Shillong, Jymmang 13: U Myntri Rangbah ka Jylla Conrad Kongkal Sangma hynne ka sngi palei ula ong ba ki Tnad treikam ka Sorkar Jylla kila lah mynta ban pynïaid shakhmat ïa ka jingthungkam thungjam lada kila lah ban pyndep ïa ka roster system ha ka jingthungkam naduh ba sdang treikam ka State Reservation Policy ka Jylla.
Ka Ïingkashari Meghalaya High Court hynnin ka sngi balang, kala weng noh ïa ka mukotduma suo moto hadien ba ka Sorkar Jylla kala ai jingmynjur ïa ka roster system jong ka State Reservation Policy. Hynrei ka Ïingkashari ka dang khang ïa ka jingthungkam thymmai katba ym pat lah ban ai jingkheiñ ïa ka jingdon ki nongtrei bala thungkam ban ïaid daka roster system.
Haba kylli, u Conrad ula ong ba ka mat hi ka long ba ka Sorkar kan hap ban pyndep ïa ki jingdonkam baroh ha kaban pyntreikam ïa ka roster system bad ban ai jingkheiñ ïa ka jingdon ki nongtrei nongtrei naduh ka por ba sdang treikam ka Reservation Policy.
“Ïa kine ki jingdonkam baroh la hap ban kitkhlieh da kawei pa kawei ka Tnad. Lada kino kino ki Tnad kila lah ban pyndep ïa kine kiei kiei baroh, kila lah ban pynïaid shakhmat ïa ka jingthungkam thungkam” ula pynshai.
Haba pynpaw ba kane ka kam kan nym leit shuh sha Ïingkashari, u Myntri Rangbah ula ïathuh ba ka Ïingkashari kala ai ka jingbthah ba baroh ki Tnad Treikam ka Sorkar kin hap ban pyntreikam thikna ïa ka roster system.
Halor ka eksamin thungkam hapoh ka Tnad Pulit, u Conrad ula ong “Lada ka Tnad Pulit kala lah ban ai jingkheiñ ïa baroh ki jingthungkam bala dep naduh ki por mynshuwa bad pynbeit ïa ki kat kum ka roster system, kila lah ban sdang thungkam mardor”.
Ha ka hukum, ka Ïingkashari Meghalaya High Court haba pynpaw ba kam pat shah satia ïa ka jingthungkam thym mai kala ong “Kane kan treikam ha baroh ki jait kam ba ïaid lyngba ka bhah thungkam khnang ba ka jingthungkam lashai lashisngi kan long tang hadien ka jingpynthikna ïa ki kam ba lait bad ba donkam ban pyndap”.
Kala bynrap “Tad hadien bala pyndep ïa ki jingdonkam baroh, ki tnad sorkar kila lah ban thungkam thymmai. Kane kan treikam ha baroh ki entry level post jong kino kino ki Tnad kiba pyntreikam ïa ka Reservation Policy”.
