Shillong, Jymmang :Ka YMCA Shillong ka la pynlong ïa ka jingïalang pynkup burom na ka bynta ki samla pule ki ba la pyndep ïa ka course DCA ka ba hynriew bnai hapoh ka jaka aijinghikai computer jong ka YMCA.
Na ka liang u President ka YMCA Shillong, u Most Revd Dr Purely Lyngdoh ha ba ai ïa ka khusnam kyrpang sha u Carl Sagan Ch Momin u ba la wan shakhamt eh na kane ka batch u la ong; ‘mynta ka jingkhang ka la plie na ka bynta ki samla pule ki ba don ïa ka jingtip jingnang ka ba kham bniah ha ka ba ïadei bad ka computer namar ki la kham long halor ha ba ïa nujor bad kiwei pat ki ba pyndep tang ïa ka graduate degree’.
Nalor kata u la ai ruh ka jingkyrkhu kyrdoh ka ba kyrpang kum ki nongshong shnong jong ka jylla bad ka ri ki ba don ïa ka jingkitkhlieh.Ha kajuh ka por u la ïai ban ruh halor ka jingdonkam ban trei minot bad ym ban shaniah ha ka bok ka nusip.U la ong ngi ju aijingkyrmen ïa ka ba bha (good luck) ka ba mut ba ngi shaniah ha ka bok ka nusip ym ha ka jingtrei shitom.
Kiwei pat ki ba la ïa don lang ha kane ka prokram ki kynthup ïa u Dr C.O. Ryngad, Vice President, Bah J.R. Myrboh, Honorary Secretary, Bah Gideon Kharkongor, Treasurer nalor ki nonghikai.Baroh ki 26 ngut ki samla pule ki la ïoh pdiang ruh ïa ka diploma certificate kata ka ba kynthup ïa phra ngut ki shynrang bad 18 ngut ki kynthei.
Ha kawei pat ka bynta na ka liang ka YMCA Computer training centre ka khot admission na ka bynta ka batch ka ba thymmai na ka bynta ka course DCA bad Tally ka ban sdang naduh u bnai Jylliew mynta ka snem.Kane ka long katkum u kyrwoh lyngba u bah Gideon Kharkongor.
