Shillong, Naiwieng, 14: U Symbud Myntri Rangbah ka jylla uba peit ïa ka tnat Kam Pohing ha ka sngi Baar u la hukum ïa ka tnat Pulit ba kan leh da kaba tyngeh ïa kino kino kiba ñiah khlemakor ïa ki thuk thuk ar shaka ne ïa ki kali saw shaka.
Kane ka jingkren jong u Symbud Myntri Rangbah ka long hadien ba kawei ka longkmie ka la duhei ïa la ka jong ka jingim hadien ka jingshah tynrah ha kawei ka thuk thuk ba la pynher stet katba ka dang pyrshang ban jam sha shiliang jong ka surok ha Mawlai Mawdatbaki.
“Nga ïohi ba kine ki jingjia ba sngewsih ki jia la jan man ka sngi. Namarkata, nga la bthah ïa u Director General of Police (DGP) bad (u la bthah) la ka long ïa ki Pulit pynïaid kali ne ïa ki bor synshar distrik ne ïa ki SP, ba kino kino kiba ñiah khlemakor ïa ki thuk thuk ar shaka ne ki saw shaka dei ban leh da kaba tyngeh,” la ong u Bah Tynsong ha ka jingïakren bad ki lad pathai khubor.
“Ngin ym ailad ïa ka jingñiah kali khlemakor bad ngin pyntikna ba kin ngat ha ki kyndon bad shah daiñ kuna katkum ka aiñ jong ka ri,” u la ong.
Ha kaba ïadei bad ka jingpynrungkam ha ka tnat Pulit, u Bah Tynsong u la ong, “ki kam ki dang thylli bad mynta ngi dang don ha ka lynti ban shon ïa ka jingpyntip paidbah (Advertisement) namarba dang shen ka kynhun myntri ka ladep ai jingmynjur katto katne ki jingpynbeit thymmai ïa ki Rule kiba la don lypa jong ka Police Central Recruitment Board bad ngi ladep pynbeit thymmai bad shen ngin sa pynmih ïa ka jingpyntip paidbah.”
Haba pynpaw ba ki Pulit kin ïai bteng ban ïakhun pyrshah ïa ka jingjyllei jong u drok, u Symbud Myntri Rangbah u la ong, ka kynhun ki Pulit ki la duh thiah duh dem bad ki pyrshang katba lah ban kem ïa ki nongkhaïi drok.
“Ngi la pyrshang ban leh ïa kaba bha tam da kaba kem ïa ki nongkhaïi drok. Na ka bynta kito kiba la im kyrni ha u drok ngi tip bha bad wat ki shnong bad ki bahaing hasem ruh ki long kiba kloi ban ai jingtip hynrei ngi donkam ban leh da kaba tyngeh shwa ïa ki snar nongkhaïi. Ngi la leh ïa kata bad ki Pulit ki la duh thiah duh dem namarba ki trei shitom,” u la ong.
Halor ka jingkylli, u Bah Tynsong u la ng, “kam dei satia ba ngim ïoh ïa ka jingtip kaba bniah, kam dei satia ba ngi duna ki nongtrei hynrei lada ki paidbah, ki lap ïa kino kino kiba ishan khmat, ki dei ban pyntip sha ngi bad ngin ym pyntip satia ïa ki kyrteng jong ki, shu pyntip ïa ngi ïa kino kino kiba ishankhmat, nangta ki Pulit kin sa leh la ka jong ka kamram.”
