Ka South West Garo Hills kan sa kylla long ka khyrdop jong kane ka thaiñ shatei lam mihngi : Timothy

Shillong, Naiwieng 14: U Symbud Lamphang jong ka ïing Dorbar Thawaiñ ka jylla u Timothy D Shira u la ïathuh ba ka jingïakren ka dang ïaid shakhmat na ka bynta ban shna ïa ka lynti rel na Kolkatta ban poi sha Mahendrganj kaba don ha South West Garo Hills na ka bynta ban kyntiew ïa ka khaïi pateng ha kane ka thaiñ shatei lam mihngi ka Ri India bad lada kane kan urlong ka South West Garo Hills kan sa kylla long ka khyrdop ïa ka North East ne ïa kane ka thaiñ shatei lam mihngi ka ri India baroh kawei.
Kane kan pynïasoh bad ka jingkieng kaba la shna halor ka wah Brahmaputra ban pynïasoh ïa ka Assam – Meghalaya ha Phulbari bad ïa kiwei bynta ri thor jong ka Garo Hills yn sa lah ban pynïasoh da ki lynti rel bad kane ka kyntiew ïa ka khaïi pateng.
Lada la shna ïa ka lynti rel na Kolkatta sha Mahendraganj ha South West Garo Hills, kane kan pynduna ïa ka jingjngai ka lynti da 500 km na Kolkatta sha Garo Hills bad na katei ka surok kan pynsuk ka leit ka wan bad kan pynjan wat ïa ki bynta jong ka Khasi Hills, Tripura, Mizoram bad kiwei ki jylla ka North East lada leit da ka rel sha Kolkatta.
Haba ïakren bad u nongthoh khubor u la ong ba un sa ïa kren bad u Myntri rangbah ka jylla u Conrad K Sangma ba un ïa kren bad ka Northeast Frontier Railway ban buh ïa ki jingpynbna lait kam ha Mendipathar Railway Station.
U la ong ba wat la ka lynti rel ka la treikam ha Garo Hills kaba don ha Mendipathar, hynrei haduh mynta ïa ki jingpynbna ba lait kam ha ka Railways pat kim pat juh wah ba ki samla na Garo Hills kin ïoh ban thep kam, kumta u la ong ba un sa ïa kren bad u myntri rangbah ka jylla halor kane ka kam.