Hadien ka jinghap u slap uba jur, shah tyllep um ki ïing sum ha Hot Spring ha Umjaraiñ

Mawkyrwat, Jymmang 13: Ka jingwan u slap ha ka step jong ka 13 tarik u Jymmang, 2022 ka la pynlong ïa ki wah kiba heh ba kin kiew ha ka jingdon jong ka um haba ïa nujor bad ki snem kiba la leit, haba phai mynta ka la don ka jingjia ba shah tyllep umsaw ïa ki jaka sum kaba don ha Hot Spring ha Umjaraiñ, South West Khasi Hills District.
Ha ka khubor ba la ïoh ban ïa kren bad uwei u samla uba dei ruh ha kajuh ka por u nongpeit nongkhmih ïa katei ka jaka sum ha Hot Spring ula pynpaw ka jingsngewsih kaba khraw namar mynta u snem watla ka por slap kam pat da dei hynrei ka jingslap ka la long kum ha ki por lyiur bah bad kum kane ka jingjia ka la jia ruh ha ki snem kiba leit khamtam ha u snem 2020 ha kaba ka jingshah tyllep um bad ka jingshah pynjot ka ka long kaba bun. “Ha kine ki snem kiba la dep shwa u snem 2020 kam da long than haduh ban da jot ki tiar ki tar, kum ki jingkhang bad ki tin na jrong, hynrei mynta u snem da ka jingwan u slap ruh ka la long kaba jur watla ka long tang katto katne kynta”, ong u samla.
Namarkata, ula ai ruh ki jingkyntu na ka bynta ki paidbah nongshong shnong ba ha kum kine ki por ba don ka jingjur slap ki dei ban kiar ban leit sha ki jaka bah eh ki um namar lada leh shlur palat ïoh kumno re kumno kan wanrah pynban ka jingsngewsih ne duh ruh wat ïa ka jingim briew.