Shillong, Naiwieng 12 : U MDC ka BJP na Tura, u Bernard Marak ha ka sngi U Blei u la pynshai ïa ki jingngeit bad ka jingpyrkhat biej ki paidbah halor u Aadhar.
“U Aadhar um dei satia uta u 666 lane u number soitan. U dei u unique identification number kumba long u mobile number, EPIC bad roll number kiba dei shaphang ka jingtip shimet jong uwei pa uwei,” ong u Marak ha ka kyrwoh.
Shuh shuh u ong ruh ba u Aadhar u dei ruh ka bor ban wanrah ïa ka jingtreikam kaba khuid ba suba bad pynbeit ïa ki jingleh thok ha ka synshar kha-dar khnang ba ki paidbah kin ïoh ïa kaei kaba bha tam. U ong ruh ba u Aadhar um don satia kano kano ka jingïadei bad ka jingngeit.
Kumta u la kyntu ïa ki paidbah ba kin dei ban pynïasoh noh ïa u Aadhar bad ki account jong ki khnang ba yn lah ban pynpoi ïa ka pisa sha ki nongïoh jingmyntoi lyngba ka jingsiew ba ïasoh bad u Aadhar.
Katkum ka jingong jong u, ka jingsiew online ka khlem lah ban treikam namar bun kim pat pynïasoh ïa ki account jong ki bad u Aadhar.
Utei u nongmihkhmat u la ong ruh ba ka jingsiew lyngba u Aadhar kan weng lut ïa ki riewshim kabu bad ki jingmlien pynbam pisa ban ïoh pat tang khyndiat ki jingmyntoi kumba la ju long baroh shi katta.
La pynshai ruh ba ki skim jong ka sorkar pdeng kum ka NREGA, PMAY, Penshon, NRLM kynthup ïa ka Scholarship jong ki samla pule la ju siew online bad ïa kane ruh la ju leh ha ka rukom kaba khuid ba suba.
