Shillong, Naiwieng 10 : U Vice Chancellor ka skulbah North Eastern Hill University (NEHU) u Prof PS Shukla ha ka sngi Thohdieng u la kyrpad ïa ka Joint Action Committee ba kan ym ïaid shakhmat ïa ka jingïakhih ba khlem buh por jong ki.
Ha ka kyrwoh khubor, u Vice Chancellor u la ong ba ka skulbah mynta ka dang bunkam bha khamtam haba ïadei ban ïabeh pyndep ïa ki syllabus bad ki eksam kiba la buh ban long ha ka taiew ba nyngkong jong u Nohprah bad kumta ka jingpynthut da kum kitei ki jingïakhih ba khlem buh por kan ktah. U ong ruh ba ka jingïakhih khlem da pynshisha shwa kan ktah ïa ka pule puthi jong ki samla pule jong ka skulbah.
“Na ka liang ka skulbah ka kyntu ïa baroh kiba don bynta ba kin wan sha ka miej jong ka jingïakren bad pynshisha ïa ki mat ba la rah bad ruh ïa ki sienjam ba la shim da ka skulbah ym ban mih shabar bad ïakhih paidbah,” u la ong. Shuh shuh u la kdew ruh ba kitei ki kynhun ba ïakhih ki dei ruh shi bynta jong ka skulbah kumta ki tip bha ïa ka jingtreikam jong ka skulbah haba ïadei bad kitei ki mat jingdawa.
Kumta, u ong ba lyngba ka jingïatrei lang kan wanrah ïa ka jingtreikam ba khlem thut bad kan ïarap ruh ïa ka pule puthi jong ki samla pule khlem da shah pynthut khamtam haba ïadei bad ka jinglah ban pynbeit ïa ka jingpyntreikam ïa ka National Education Policy 2020.
“Haba don kano kano ka jingpynthut ha ka snem pule kan ktah ym tang ïa ka jingpyndep ïa ka syllabus hynrei ruh ïa ka jingpynlong beit pynlong ryntih ïa ki eksam kaba ktah ïa ki samla pule ha kaba kadei ka thong kaba hakhmat eh jong ki samla pule,” bynrap biang u Prof Shukla.
Hapoh ka shatri jong ka JAC, bun ki kynhun kynthup naduh ka NEHUTA, NEHUNSA bad ka NEHUSU ha ka sngi Palei ki la rai ban pynjur shuh shuh ïa ka jingïakhih da kaba khot ïa ka jingïakhih ba khlem buh por naduh ka 13tarik kum ka dak ka jingpyrshah ïa ka jingkuman jong u VC ka NEHU haba ïadei bad ki mat jingdawa kaba ki buh.
