Ka jingkynnoh u MLA halor ka surok Dawki-Amlarem-Jowai ka long kaba bakla: Bah Process

Shillong, Naiwieng 08 : U Bah Process T.Sawkmie, MLA barim mynta ka sngi u pynpaw ba ka jingkren u MLA ka Mylliem uba la kynnoh ïa ka sorkar ba kam ïohi jngai halor ka surok Jowai-Amlarem-Dawki ka long kaba bakla.
“Namarkata ka sorkar kaba mynta ka hap ban shimti ïa kane ka project jong ka surok Dawki-Amlarem-Jowai, tang namarba ka sorkar Congress kam shym la lah ban pynurlong ne pheil ha ka por ka jongka” ong u bah Sawkmie.
U pynpaw ba ki nongïalam ka Congress ki dei ban sngewthuh ba ka Indian National Congress ka la synshar ïa ka jylla palat ïa ka Sawphew snem bad ki paidbah ka jylla kim da ïohi than eh ba kan kiew ka roi ka par ha ka por ba synshar ma ki.
U la pynpaw ruh, ki nongïalam ka Congress ki la dei pynban ban ïaroh ia ki kam ba la leh da u Myntri Rangbah ka jylla bad u Symbud Myntri Rangbah bakhmih ïa ka tnad PWD, kiba la shimti bun ki project lyngba kane ka sorkar kaba mynta.
“Shimet, nga kyrpad ïa baroh ki paidbah ka jylla, naduh ki rangbah shnong, ki sengbhalang ban ïasnohkti lang bad ka sorkar haba pyntreikam ïa kino kino ki project hapoh ka jylla,” ong u bah Sawkmie bad u la bynrap, “Dei tang lada ngi ïa trei ryngkat ngin lah ban pyndep pura ïa ki project, khamtam ki project baheh.”