Shillong, Naiwieng, 06: Ka Sorkar Jylla ka la rai ban bishar bniah ïa ka jingtreikam jong ki Civil Hospital bad ki District Hospitals kiba don ha kylleng ka jylla hapoh ki 36 bnai nalor kaba pynbiang ruh ïa ka jingduna jong ki doktor da kaba ai ïa ki jingsiew tam.
Ïa kane ka rai la shim ha ka jingïalang ba la pynlong da u Myntri Rangbah ka Jylla ryngkat ka jingdonlang jong ka Myntri ka Koit ka Khiah ka Dr. Ampareen Lyngdoh bad ki ophisar ka tnat ha ka Lah Sngi u Blei.
Ha ka jingïakren bad ki lad pathai khubor, ka Dr. Ampareen ka la ong, ha ka jingïalang la rai ban bishar bniah ïa ka jingtreikam jong ki Civil Hospital bad ki District Hospitals kiba don ha kylleng ka jylla Meghalaya. Ka Sorkar ka la rai ban bishar bniah ruh ïa ki jingtreikam, bad ka jingdonkam jong ki tiar.
“Ngin aipor ïalade kumba 24 haduh 36 bnai bad ngin sa bishar bniah ïa ki rukom treikam,” ka la ong.
Da kaba pynpaw ba ki jingdonkam bahakmat eh jong ki Hospital Sorkar ka long halor ki nongtrei, ka Myntri ka Koit ka Khiah ka la ong, “u Myntri Rangbah u la pyntip halor ka jingduna jong ki paramedical staff, ka jingduna ki Specialists bad ki Medical Doctor. Ïa kane ka jinglum jingkheiñ la leh da ka jingthmu ban pynthikna ba ngin dup lah ban tih bniah ïa ki jingtreikam jong ki hospital.”
“Ngin ap sa kawei pat ka jingïalang bad u Myntri Rangbah ban peit ba kiei pat ki jingdonkam bad kaei ka jingdonkam ha ka pisa pilaiñ ba ka Sorkar kan shim ban pynthikna ba ki jaka ai jingsumar kin long kiba treikam pura,” ka la bynrap.
Ka Dr. Ampareen ka la ïathuh ba ka tnat ka la phah ruh ka jingtyrwa kumno ban pynthikna ba ki Specialist Doctor kin trei ha ki hospital Sorkar kiba don ha Meghalaya.
“Ngi dei ban buh ïa ka jingsiew kaba biang bad la rai ba ki ophisar kin leit ban bishar ïa kine ki jingtyrwa lane ki song ban tyrwa sha kine ki doktor khnang ba ngin dup lah ban pyndap ïa ki kam ba thylli ha ka specialist category,” ka la ong.
Ka la bynrap ba ka don ka jingïajngai hapdeng ki Medical Officers (MOs). “Ngi la tip lut ïa ki jingshisha ba ma ngi kum ka Jylla ngi suhsat bha na ka jingeh jong ki Medical Doctor. Ka jingdon jong ki MO ka long 60-70%,” la ong ka Myntri bad bynrap, “mynta ngi la bishar bniah ïa kine ki jingdkoh bad ngin sa lah ban wanrah da ki song kiba lah ban khring ïa ki doktor.”
Shuh shuh ka la ïathuh ba ka Sorkar ka la rai ban wanrah ïa ka polisi kaba pynthikna ïa baroh ha ka tnat ka Koit ka Khiah ba ki dei ban shah pynkynriah kam sha ki jaka kiba kham jynjar.
“Ha ki jaka kiba jngai ka jingsumar ban pynïoh sha ki paidbah lyngba ka tnat ka Koit ka Khiah, kan mih ka jingeh na ka daw ka jingkyrngah jong ki nongtrei. Ngi dang khmih bniah ïa kane ka polisi ban pyntreikam lut ïa baroh kiba trei hapoh ka tnat ka Koit ka Khiah,” ka la ong.
Ka la ong ba manla ki nongtrei ha ka tnat ka Koit ka Khiah kim dei ban pyni nuksa ban kyntait namarba ngim don ïa ki kyndon ban ai jaka sah na ka bynta ki nongtrei haba ki shah pynkynriah kam shabar.
“Ngi la bishar lut nadong shadong bad ngi la ïohi ba ki kyndon kumno ban pynbiang ïa ki jaka sah ïa ki doktor bad ïa ki Nurse. Ngi kyrmen ba ngin sa lah ban leh ïa kata,” ka la ong.
Ha kajuh ka por, ka Myntri ka la ïathuh ba ka Sorkar kan sa peit bniah ba ka tnat ka jingsumar kan long sha baroh ki nongshong shnong lyngba ki jaka ai jingsumar khlem da pynbor ïa ki nongpang ban mih na la ki jong ki shnong, ne ki ing ki sem ban leit wad jingsumar sha kiwei ki jylla ne sha kino kino ki bynta jong ka jylla.
Ka la ong ba ka Sorkar kan sa shong pyrkhat kam ha Civil Hospital, Shillong bad ban peit haduh katno ki paidbah ki ai ïa ka jingshahniah ha kane ka jaka ai jingsumar.
Haba ïaroh ïa ka jingshimkhia jong u Myntri Rangbah, ka la ong, “ngi kyrmen ba kan pynduna ïa ka jingïap khlem dei por jong ki longkmie kiba ar met bad ngi kyrmen ba kane kan pynduna ha baroh kawei ka rukom treikam jong ka tnat ka Koit ka Khiah.
Halor ka jingdon jong ki dawai, ka Dr. Ampareen ka la ïathuh ba u Myntri Rangbah u la ai jingmut sha ki ophishar ban pynthikna ban buh ïa ki Dispensary ha manla ki civil hospital ne ki MCH hospital lane ha ki Subdivisional Hospital kiba don ha kylleng ka jylla Meghalaya.
