Lyngngoh ka JNC ïa ka jingkren u Bah Kyrmen Shylla halor ka jingthmu pynoi lynti Rel ha EJH

Khliehriat, Risaw, 29: U President rangbah jong ka Jaiñtia National Concil (JNC), u bah Sambormi Lyngdoh u la pynpaw ka jingsngew lyngngoh bad sngew pyrshah ruh ïa ka jingkren laplah u MLA jong ka Khliehriat uba dei ruh u myntri jong ka sorkar jylla, u bah Kyrmen Shylla ha kaba ïadei bad ka mat jong ka jingthmu ka sorkar ban wanrah lynti rel ha East Jaiñtia Hills District ha kaba utei u myntri sorkar u la ong ba kam pat dei eh ka por ban bishar ïa kata ( Too eraly to judge).
Na ka liang ka seng ka la pynpaw ruh da kaba ong ba “Dang ha kine ki khyndiat bnai ba la leit, ka seng ka la dep ban iakynduh markhmat bad u bah Kyrmen Shylla bad u la pynpaw ba ïa mynta hi um pat lah ban ong eiei namar um pat tip bha shaphang kata ka railway”
Na ka liang utei u nongialam jong ka JNC, u la ong ba haba pyrshang ban wad bniah halor kane ka Railway Project, u la sngewthuh ba ka don ka jingma kaba ap ba na kata kaba dang kloi eh ban bishar namar ba ïoh kan poi pynban sha u pud ba ïoh kan slem eh pynban.
Haba kren sha ki pathai khubor u bah Sambormi Lyngdoh u la ong “Ka seng ka sngew lyngngoh ruh ba kat u myntri sorkar um pat shym la tip satia ïa ka jingthmu jong ka sorkar halor kata ka railway project ba ka dei ka rel kit mar ne ka rel kit briew, ka seng ka pynpaw ruh ba lada ka sorkar ka buh ïa ka roi ka par hakhmat te balei kam phai pat sha kiwei ki jait kam pynroi kum kaba wanrah ïa ka College sorkar (Government College), ki Residential School bad ka jingpynbit pynbiang bha ïa ka surok ruh ka dei kawei kaba wanrah jingmyntoi bha ïa ki paidbah ka thaiñ”
“Ha ka jingkren jong utei u myntri sorkar ha kato ka sngi u la ong ruh ba lada ka wan ka lynti rel kan wanrah jingmyntoi ïa ki paidbah bad ka surok ruh kan nym sniew palat, namar yn ïaid lyngba da ka rel, na ka liang ka seng ngi sngew ban pynpaw ba lada ka sorkar ka shimkhia, ka surok ruh kan nym sniew than kumba ka long mynta”
Ka Jaiñtia National Council ka pynpaw ruh ka jingsngew lyngngoh ba ha kaba ïadei bad kane ka jingthmu ban wanrah lynti rel, wat ki nongmihkhmat kiba na ri lum Jaiñtia ruh i kumba ki sngew tynnad bad sngew ïahap jingmut lang bad ka sorkar bad ki kloi bha ruh ban kren eiei halor kane hynrei haba phai pat sha ki lad pynroi (development) na ka bynta ka ri lum Jaiñtia, ym don uwei ruh na ki nongmihkhmat u ban kren eiei.
La ong ba halor kane ka bynta na ka liang ka seng hi kan sa leit hiar sha ki shnong ki thaw kiba don hapoh Jaiñtia Hills ban pynsngew paidbah bad ban ai ruh ka jingpynshai bad ki jingïasyllok ha ka ba ïadei bad kane ka jingthmu ka sorkar ban wanrah ïa ka lynti rel ha East Jaiñtia Hills.