Ka MBOSE ka dei ka Board kaba biang tam ong u Dy CM ha ka sngi plie ïa ka jingrakhe dap 50 snem

Tura, Risaw 18: U Symbud Myntri Rangbah ka jylla u Ma Sniawbhalang Dhar, mynta ka sngi Balang ula plie ïa ka jingrakhe ïa ka Jubili Ksiar jongka Meghalaya Board of School Education (MBOSE), Tura ha ka jingïalang kaba la long ha Green Haven, New Tura.
Haba kren ha ka jingïalang u Ma Sniawbhalang ula pynpaw ïa ka jingsngewnguh ïa ki jingjop jongka MBOSE ha ki 50 snem kiba la leit bad bynrap ba ka MBOSE ka dei ka Board kaba biang tam ha ka ri baroh kawei.
Nalor kane ula pynpaw ba ka la don ka jingïaid shakhmat bad ka jingkiew ha ka liang ka pule puthi ha ka thaiñ watla ka la mad ïa kiba bun ki jingeh hynrei ka Board ka la lah ban kiew shaphrang bad u kyrmen skhem ba kan ïoh kheit ïa u soh ka jingjop ha ki snem ki ban dang wan.
U Symbud Myntri Rangbah ula ïaroh ruh ïa ka jingleh bha jong ki khynnah na ki skul bapher bapher bad ula ai khublei ruh ïa ki ophisar bad ïa baroh ki nongtrei kiba la trei met bad mynsiem na ka bynta ka bha ka miat jong ki paidbah ka thaiñ.
Katba u Myntri ka pule puthi u Rakkam A Sangma ula ai khublei ïa baroh kiba don ha ka longïing jongka MBOSE ha kane ka sngi kaba kyrpang bad ula ai khublei ïa baroh kiba trei borbah na ka bynta ka Board ha ki 50 snem kiba la leit.
Ula pynkynmaw ruh ba ka jingseng ïa ka Board ha Tura, ka long ka ban sah jingkynmaw khamtam haba ka Meghalaya ka la ïoh ïa ka jylla ba pura bad ula ong ba ka jingseng ïa ka MBOSE ha Tura ka long ka jingkyrkhu ïa ki paidbah ka rilum Garo bad ïa ki paidbah ha ka jylla baroh kawei.
U Controller of Examinations, MBOSE Tura u Bah T.R.Laloo ula pyni ïa ka jingïaid lynti jong ka MBOSE naduh ba la seng ïa ka bad u la pynkynmaw ïa ka jingpyntreikam ïa ka Meghalaya Board of School Education Act ha u snem 1973, kaba long kaba kongsan ha ka ban pyrkhing bad ban pynïaid ïa ki jaka pule ha ka jylla.
ïa ka eksam kaba nyngkong eh jongka High School Leaving Certificate (HSLC) la pynlong ha u snem 1973 ha kaba 3797 ngut ki la ïaleh ïa ka eksamin bad kiba la pass ki long 38.3% percentage katba ha u 2023 ka pass percentage ka la kiew sha ka 78%.
Ha shwa kane ka prokram u Ma Sniawbhalang ula pynher ïa ka lama jongka MBOSE, ula pyllait paidbah ïa ka kot sah kynmaw bad la ot ruh ïa ki cake jong ka jingdap 50 snem.
Ha kane ka jingïalang la ïadon lang u Adviser ka tnad pule puthi u bah H.M Shapliang, u MLA ka Rangsakona Constituency uba long ruh u Chairman ka Meghalaya Khadi and Village Industries, Subir Marak, Executive Chairman ka MBOSE u CP Marak, u Secretary ka Education Department u Ambrose Ch Marak, u Joint Director (Administration), Shillong Regional Office Bah Macdonald Marbaniang, ki heh ki haiñ bad kiwei kiwei.