Shillong, Risaw 18 : U President ka United Democratic Party (UDP) u Bah Metbah Lyngdoh ula ïathuh ba ka party kam pat rai satia ïano ban ai ticket ban ïakhun ia ka elekshon MP-Lok Sabha 2024 na ka Shillong Parliamentary Constituency.
“Ki la don 2-3 ngut kiba la pynpaw sha ka party ba ki kwah ban ïakhun ïa ka elekshon Lok Sabha na ka ticket ka party na ka shillong Parliamentary Constituency, hynrei ngim pat shim rai satia ïano ïano ruh”.
Une u Nongïalam ka UDP bad MLA ka Mairang ula pynpaw “Ka long kaei kaei kaba sngewtynnad ba ki don bun ngut kiba la pynpaw ba ki kwah ban ïakhun MP na ka UDP”.
Lah ban kdew hangne ba lai tylli ki kyrteng ki la mih pyrthei, ki ban pan ticket na ka UDP ban ïakhun ïa ka elekshon MP Lok Sabha.
Arngut ki dei ki MLA barim ba kynthup ïa u Bah Process T Sawkmie na Mawlai Constituency bad u Bah Jemino Mawthoh na Nongthymmai Constituency.
Uwei u dei u Nongïalam ka Hynniewtrep Youth Council (HYC) uba la ïehnoh kam kum u President kane ka seng. Une u dei u Bah Robertjune Kharjahrin uba bat mynta tang kum u Chief Adviser ka HYC.
“Ngi sngewkmen ba ki don bun ngut kiba kwah ban ïakhun ilekshon MP 2024 naka UDP hynrei ïa ka rai ba khatduh yn shim hi ha ka jingïalang jong ka Party” ong biang u bah Metbah.
Haba phai sha ka elekshonn MDC 2024, u Bah Metbah ula ong ba ka UDP kam pat ïakren ne shim ïa kano kano ka rai halor kane ka elekshon haba pyntip ba ki la don ki MDC kiba pynpaw ba ki kwah ban ïakhun ïa kane ka elekshon na ka ticket ka party kynthup ruh ki MDC ba mynta jong ka party.
