Shillong, Risaw 14 : U Myntri Rangbah ka Jylla, Conrad K Sangma hynne ka sngi Thohdieng u la plie paidbah ïa ka karkhana shna bad pynmih ïa ki LED bulb kaba don ha Hawakhana, Tura kaba la pynïaid da ka GHE Impact Ventures bad kyrshan da ka sorkar jylla.
Haba kren ha katei ka jingïalang plie paidbah ïa katei ka karkhana, u Myntri Rangbah u la ong ba ka jingseng ïa kane ka karkhana ka dei ka mawjam ba nyngkong ha kaban lah pynmih bording kaba khuid.
“Ngi la pyrshlur bad pyrshang ban don ïa ka sawdong sawkun kaban pynmih ïa ka bording kaba khuid bad kaban dap na bynta ka jingdonkam,” u la ong da kaba kdew ruh ba katei ka karkhana ha Tura kan dei kaba nyngkong ha ka jylla ban long ka nongmuna ïa kiwei pat ki bynta jong ka jylla.
Ula kyntu ïa ki paidbah ba kin pyndonkam ïa ki mar ba la pynmih hi na Jylla kynthup naduh ha ki tnad treikam jong ka sorkar jylla, ha ki iing ki sem bad ruh ha ki jaka treikam ba pher bapher ban pynshlur ïa ki paidbah ban sdang pyndonkam noh da ki tiar ba mih hi na la ka rympei.
Baroh ki don haduh 85 ngut ki samla shynrang bad kynthei kiba don ha katei ka karkhana shna LED bulb jongka GHE Impact Ventures.
