Shillong, Risaw 11 : Ka Bethany Hospital ha ka sngi Ba ar ka la pynlong ïa ka Dr. John L. Sailo Ryntathiang Memorial Oration kaba ba-ar, kum shi bynta ban kynmaw burom ïa u synñiang uba la noh da u nongseng jong ka Hospital u (L) Dr. John L. Sailo Ryntathiang.
Ha kane ka jingïalang la ïoh ïa ka jingkren na u Dr. Kethoser Kevichusa, uba long u nongkren paidbah bad u nongthoh kot uba pawnam, uba la ïoh pdiang ruh ïa ka First Gordon Graham Prize ha ka Naga Literature.
U Dr. Kevichusa ula kren ïa ki nongrim kiba kongsan jong ka Bethany Hospital, kaba kynthup ïa ka mynsiem ban ïarap, ka jingsumar sukher bad ka jingtrei shitrhem na ka bynta ka bha ka miat bad ula banjur ïa ka jingdonkam ïa ka mynsiem ban ïarap ha ka liang ka jingai jingsumar ym tang ha ka ban sngewthuh ïa ka jingshitom jong kiwei hynrei ban don ïa ka mynsiem ban pynduna ïa katei ka jingshitom bad ula ïaroh ruh ïa ka hospital ïa ka jingshim ïa ki sienjam ban don ïa ka mynsiem ïarap ha kaba ïadei bad ka jingai jingsumar.
Ula pynpaw ruh ba wat la ka hospital ka don ïa ka thong hakhmat eh ban pynkhiah hynrei ban ai ka jingsumar jingsukher ruh ka long kaba kongsan bha bad ka jingai jingsumar sukher kam dei tang ban sumar ïa ki nongpang hynrei ka dei ruh ban pynlong ïa ki nongpang ba kin sngewsuk mynsiem bad ba kin ïoh ïa ka jingkyrshan.
U Dr. Kevichusa ula banjur ruh ïa ka jingdonkam ban don ïa ka mynsiem kaba shitrhem ha ka kam ai jingsumar bad ula ai jingmut ba ka jingsumar sukher ka lah ban ïaid palat ïaka jingkoit jingkhiah, ban pynsuk mynsiem bad ban phaikhmat ïa ka jingkongsan jong ka jingim.
Ha kane ka sngi la ïoh ruh ïa ka jingpynbyrngia na u Nise Meruno, uba dei u Nongkit Tiensyiem jong ka Yamaha.
