3 sngi ai jinghikai ka CBC halor ka khuid ka suba bad ki jingbam ba teimet

0

Nongpoh, Risaw, 11: Kum kawei na ka thong ban ïalap sha ki paidbah halor ka thong jong ka sorkar kmie ban wan rah ïa ka khuid ka suba bad kumjuh ruh ban ai jinghikai halor ki jingbam ba tei met ban ïoh ïa ka koit ka khiah, ka Central Bureau of Communication na ka Ministry ka tnad Information and Broadcasting ka sorkar India ka la pynlong ïa ka prokram ai jinghikai ba 3 sngi, kaba dei halor ka phang “Swachh Bharat and Poshan Abhiyan” na ka bynta ban bankhi halor ka jingdonkam ban wan rah ïa ka khuid ka suba bad ruh ban tip halor ka jingkordor jong ki jingbam ba tei met.
Ïa kane ka prokram la pynlong ha Alpha English Higher Secondary School, Nongpoh ha kaba la wan ban plie paidbah mynta ka sngi da u Manish Kumar, IAS bad uba dei ruh u Assistant Commissioner ka Ri Bhoi bad la shim bynta ruh da ki khynnah skul katei ka skul lem bad kiwei ki khynnah skul jong ki skul na ka thaiñ Nongpoh.
Ka Additional Director General ka tnad Zonal Central Bureau of Communication, Guwahati, Ka Jane Namchu ka la wan ruh ban shim bynta kum ka kongsan ha kane ka prokram bad kiwei kiwei kiba la ïa sakhi lang ha kane ka sngi ba la plie paidbah ïa katei ka prokram da ka jingdon lang u Bah Biangbok Basaiawmoit,uba la wan mihkhmat na ka C&RD Block Umling, ka Kong D. Shylla, kaba dei ka Nutritionist na ka ophis ka DPO, ka Kong W.K Blah, Principal ka Alpha English Higher Secondary School, Nongpoh nalor kiwei kiwei ki riew pawkhmat.
Ha kane ka sngi sdang jong kane ka prokram la ai jingkren da katei ka Director General, ka Jane Namchu, u Manish Kumar Singh, ka Kong D. Shylla kum ka Nutritionist, ha kaba ka phang pdeng kaba ki la ïa kren ka dei halor ka khuid ka suba katkum ka thong jong ka Swachh Bharat Mission bad kumjuh ruh halor ki jingbam ba tei met lyngba ka scheme kyrpang ka sorkar kmie ba la tip kum ka Poshan Abhiyan.
Ka Kong D. Shylla kum ka Nutritionist ka la kren kyrpang tang halor ki jingbam ba tei met ba ki paidbah kim dei ban bam klumar ïa ki jingbam bad ki dei ban bam da ki jingbam ba don jingtei khnang ba kin long kiba koit ba khiah bad kitei kiwei ki la kren kyllum halor ka khuid ka suba ka jingdonkam ban pynneh ïa ka khuid ka suba bad ruh ban don kata ka jingkitkhlieh ban wan rah ïa ka khuid ka suba bad khamtam ban ïada ïa ka mei mariang da kaba ngin tyngkai kumno ban pynneh ïa ka khuid ka suba hapneh ka mei mariang.
Lyngba jong kane ka sngi, ka Central Bureau of Communication, na ka Ministry of Information and Broadcasting, ka sorkar India ka la pynkup burom ruh ïa uwei na u nonghikai ka Alpha English Higher Secondary School, u Babu Madhav Singh, uba dang shu ïoh pdiang shen ïa ka Teacher’s National Award ba la sam da ka Presidnt ka ri India, ka Droupadi Murmu ha ka sngi khraw ki nonghikai ha Nongbah Delhi.
Na ka bynta ban ïalap halor ka khuid ka suba, ka Central Bureau of Communication na ka Ministry ka tnad Information and Broadcasting, ka sorkar India kan sa pynlong ruh ïa ki prokram bapher bapher kum ka jingïakop shondur ïa ki nongïaleh laitluid ka ri na ka thaiñ Shatei Lam Mihngi ka ri India, ki jingïakop kyntip ktien, ki jingïakop shad, ki jingïakop dro bad kiwei kiwei ki prokram kiba dei shi bynta halor ka khuid ka suba.

Leave A Reply

Your email address will not be published.