Khliehriat, Risaw : U Deputy Commissioner ka East Jaiñtia Hills District, Khliehriat da kane u khor u wer ïa ki nongshong shnong ka district kynthup ïa kito kiba dei na ki society, kompeni, corporation, kynhun seng bad kiwei pat kiba la rejister kumjuh ïa ki bym pat rejistar ïa kiba la ithuh da ka sorkar jylla kum ki SHG, Village Organizations, Producer Groups bad kiwei pat ba kin aplai ia ka CM-ELEVATE Program ba la kyrshan da ka sorkar jylla kaba thmu ban aijingkyrshan ha ka liang ka sengkam seng jam bad ban kyntiew ïa ki jingtreikam bapher bapher.
ïa kane la pyntreikam lyngba ka Single Window application portal kaba thmu ban lum jingtip ruh ha kaba ïadei bad ki jingdonkam bapher bapher jong ki paidbah, kata naduh ka phang kaba ïadei bad ka rep ka riang, ka rep soh rep syntiew bad kiwei, ka kam ri jingri, ki kam jngohkai nalor kiwei kiwei.
Kino kino ki riew shimet bad ki kynhun na ka jylla kiba hapdeng ka rta 18-58 snem rta ki lah ban aplai da kaba leit lyngba ka CM-ELEVATE Portal, bad ka tarik ba khatduh ka long ha ka 31 tarik Risaw 2023.
Ka jingbishar bniah kan long halor ki nongseng kam lajong, ki kam ba ki trei mynta, ki jingioh jingïarap pisa ne loan, ka jinglong lakloi ban siew ïa ki loan bad kiwei pat.Shuh shuh ïa ki jingtip kiba kham bniah bad na ka bynta ki lad jingïarap, ki nong aplai ki lah ban phone sha u Help Line No. 85880-52636 bad ki lah ruh ban pan jingmut da ka e-mail lyngba ka e-mail address help@cmelevate.in.
