Ha ka jing-i-phuh i-phieng rakhe ka St. Xavier’s College ïa ka College Day 2023 ba nyngkong

Mawkyrwat, Risaw 03: Ka St. Xavier’s College, Umoid, South West Khasi Hills District ha ka jingi-phuh i-phieng ka la rakhe ïa ka sngi leh kmen jong ki samla pule ne ka College Day ba nyngkong jong u snem 2023 ha ka Hall jong kane ka College, Umoid ha kaba u Ma Vincent H. Pala, Member jong ka Parliament na ka Shillong Constituency u la long kum u kongsan.
Haba kren kum u kongsan, u Ma Vincent Pala u la pynpaw ka jingaikhublei na ka bynta ki nongpynïaid jong kane ka skul pule kaba la shim ïa kane ka synjam ban pynlong ïa kum kine ki jait jinglehkmen kiba long shibynta jong ka pule puthi lyngba ka jingpyni jong ki ïa ki sap ki phong ba ki ki don kum ki samla pule. Ha kajuh ka por u la ai ruh shibun ki kyntien kyrkhu kyrdoh ïa ki samla pule, ki nonghikai bad ïa ki kmie ki kpa namar dei ma ki kiba ka daw jong ka jingpyni-phuh i-phieng ïa kane ka sngi bad ka ban long da shisha ka jingsah jingkynmaw pateng la pateng ïa ka jingïaid lynti jong St. Xavier’s Umoid College.
Ym tang kata, u la ong ruh ba kane ka skul pule kam dei tang na ka bynta ka jong kito kiba don ka jingïadei bad ka niam Katholik hynrei ka dei na ka bynta baroh kito ki samla jong ka dong ka thaiñ kiba don ka jingthrang ban wad ïa ka jingnang jingstad. Namarkata, ki kmie ki kpa kim dei ban sngewthuh bakla hynrei ki dei ban pynshlur ïa la ki jong ki khun ki kti ban beh sah ki jingpule khnang ba ka lawei jong ki kan long kaba phyrnai namar ha kum kine ki jaka pule kin ïoh shibun ki jinghikai kiba ïa dei bad ka akor ka burom, ka riti ka dustur ka jingnang jingstad bad ki wei de khamtam eh ban tip ruh ïa U Blei.
Haba bynrap shuh shuh ïa ka jingkren, u la ong ba lada ïa nujor bad kiwei ki jylla hapoh ka Ri India, ki samla pule bad ki briew na South Indian ki dei ki briew kiba trei shitom bha naduh ki kmie ki kpa bad ki samla pule, kumta da ka jingtrei shtiom ki mih shibun ki ‘riew stad bad ki ‘riew shemphang. Namarkata, kum ki samla pule ki dei ban long kiba trei shitom bad minot bad ka jingkyntu ka long ym tang na ka bynta ki khynnah skul hynrei ki kmie ki kpa ruh khnang ba kin lah ban kynjoh sha kata ka thong bad ka nam kaba hajrong.
Ha kane ka sngi la ïadonlang ruh ka Deborah Marak, Deputy Chief Minister barim jong ka Jylla Meghalaya kum ka symbud kongsan, u Principal jong ka St. Xavier’s College, Umoid, u Dr. Sunny Augustine, SJ uba la ai ki kyntien pdiang sngewbha, ki Phadar, ki Sisters, ki samla pule, ki nonghikai, ki kmie, ki kpa bad kiwei de.
Ban pynshit pynshngaiñ shuh shuh ïa kane ka prokram la ïoh ruh ki jingrwai ki jingshad bad ki jingpyni ïa ki phlim kaba ki ai kyrteng’’Ksyid Tynjang & Drugs’ kaba don ruh ka jinghikai na ka bynta ki samla pule.