Plie ka Myntri ka koit ka khiah ïaka Traditional Healing Clinic ha Ri-Bhoi, angnud ban pynneh pynsah ïaki dawai kynbat bad ka rukom sumar tynrai

Nongpoh, Risaw 03: Ka long ka jingkmen bad ka jingioh mynsiem ïaki nongsumar tynrai ha Ri-Bhoi District ha kaba lyngba ka song jingïarap jong ka sorkar jylla kala ioh ban tei bad plie paidbah mynta ka sngi ïaka jaka ai jingsumar tynrai lyngba ki dawai kynbat ha Pahamsyiem, Ri-Bhoi bala tip kum ka Meghalaya Traditional Healing Clinic ka ban peit bad khmih da ka Ri-Bhoi Traditional Healer Association (RBTHA).
Ïa katei ka jaka sumar dawai kynbat la wan ban plie paidbah da ka kong M Ampareen Lyngdoh Myntri ka tnad ka koit ka khiah kum ka kongsan, haka jingdonlang u Bah Mayral Born Syiem MLA ka Nongpoh, Dr C Lyngdoh MLA ka Umsning, Bah Balajied Ranee MDC ka Nongpoh, Gunanka DB Joint Secretary ka sorkar jylla bad Member Secretary ka BRDC, Dr Junie P Lyngdoh Sr. Scientist BRDC, ki nongïalam ka RBTHA naduh u Bah Jasper Manih President, Ellington Syiem Secretary lem bad ki nongsumar tynrai na kylleng ka Ri-Bhoi bad ka jylla baroh kawei.
Ïa katei ka jaka sumar tynrai lyngba ki dawai kynbat la tei haka jinglut kumba 8 lakh lyngba ka tnad Bio-Resource Development Center, Shillong.
Naka liang u Bah Jasper Manih kum u President ka RBTHA u la pynpaw ba kane ka dei ka jingphohsniew jong baroh ki nongsumar khasi ban dang pynim ïaka rukom sumar tynrai khamtam ban pynneh pynsah ruh ïaki dawai kynbat ha kaba kum ka kynhun hi kam kwah ba kane ka jinghikai da ki longshuwa man shuwa halor ki dawai kynbat bad ki rukom sumar tynrai kin duh kin dam noh hynrei ban dang trei shitom ban pynneh pynsah ïa katei ka rukom sumar.
La ai jingkren ruh ha katei ka sngi da u MDC ka Nongpoh u ba la krenshai ba kum ka District Council ka don ka bynta kaba khraw ban pynioh ka jingithuh ïa katei ka rukom sumar tynrai bad naka liang jong u kum u MDC u la bynta bad katei ka kynhun naduh kaba sdang ban suit ban shor ïaka bad khamtam ba kitei ki nongsumar kin ioh noh ïaka jingithuh.
Naka liang u Bah Mayral Born Syiem bad u Bah C Lyngdoh MLA ka Umsning kila ong ba nalor ka jingsumar lyngba ki doctor haki Hospital, ka rukom sumar tynrai ka dei kaba kyrpang ha kaba ki nongsumar ki don ka jingstad bad ka jingtip ba kyrpang ban sumar ïaki jait jingpang bapher bapher, watla bun naki paidbah kial sdang ban leit sha ki doctor haki hospital, pynban ka long kaba kongsan ban pynim ïa katei ka jait jingsumar namar ka don laka jong ka bynta ban pynkoit ïaki nongpang, da kaba kyntu ruh ïaki nongsumar ba kim dei ban leh shlur ïaki jait jingpang kiba kham ma hynrei ban sumar katkum ka bor ka jong ki bad khamtam ban ïaid ryngkat ruh bad ki bor hospital naka bynta ban leh ïaki test ban tip ïaki jait jingpang, bad khmih lynti ba katei ka jaka sumar kan ai ka jingshakri kaba paka sha ki paidbah ban pynjem bad pynkoit ïaki jait jingpang lyngba ka rukom sumar tynrai.
Ka kong Ampareen Lyngdoh kum ka kongsan haba kren ha katei ka sngi kala pynpaw ka jingsngewkmen kaba khraw ban iohi ba katei ka jaka sumar kala ïeng ha katei ka jaka ban sdang ïaka jingshakri sha ki paidbah bad ban pynkoit ïaki jait jingpang bapher bapher lyngba ka rukom sumar tynrai da kaba kyntu ruh ïaka Association ban lum ban lang ïa baroh ki nongsumar tynrai ba kin don lang ha kajuh ka shatri khamtam ban pynim biang ïa katei ka rukom sumar tynrai.
Naka liang ka kong Ampareen kala pynpaw ba ka jingkhuid jingsuba haka rukom sumar ka dei kaba donkam ban ioh ïaka jingithuh, khnang ba ki paidbah sa shisien kin phaikhmat biang ïa katei ka rukom sumar bad ban dih da ki dawai kynbat ki bym don jingktah ïaka met jong u briew bad kum ka myntri kan da shimkhia ruh ban ïakren bad ka BRDC ban dang pynheh shuh shuh ïa katei ka jaka sumar ban ai ka jingshakri sha ki paidbah haka liang ka koit ka khiah, kala bynrap.
Ha katei ka sngi naka liang u Bah Mayral Born Syiem MLA ka Nongpoh u la kular ruh ban ïarap 2 lakh naka bynta ban pynmang skhim ïaka jaka thung ïaki dawai kynbat jong ka RBTHA.