Jowai, Risaw 02: Ka Hynñiewtrep Border Disputed Redressal Forum lyngba u Chairman jong ka u ma Chandame Sungoh la ong ba ki ai ka jingkyrshan pura ïaka rai jong ka shnong Lapangap ban ym phut lane kynriah ïaki tynrai dieng baki la thung haka jaka kaba kyrteng Moopyrdet.
Kum ban shu pynkynmaw ba haka 28.9.2023 haka jingïakren jong ki ar DC’s jong ka West Jaiñtia bad West Karbi Anglong te u DC jong ka West Jaiñtia ula mynjur ïaka jingdawa jong ki Karbi ban phut lane kynriah ïa kito ki trai dieng. Hynrei ka Dorbar Shnong Lapangap pat haka jingïalang kaba la long haka 29.9.2023 kila rai ban ym phut na kynriah ïaki to ki tynrai dieng.
Ka Furom ka buh jingkylli, ba haba ki thung ïaki dieng lajong haka khyndew ka shyiap la jong te balei ki dei ban phut bad kynriah patï Lada phut ïa kine ki tynrai dieng te ka pyni ba ngi thung shaka jaka jong kiwei keiñ.
La ong baka jingmynjur jong u DC bad phut ïakine ki tynrai dieng ka long kaba bakla bad ka long ruh kumba pyndem hakhmat jong kine ki Karbi. Bad kalong ruh kumba ailad ïakine ba kin kyntur ïa u pud u sam jong ka shnong Lapangap bad jong ka jylla Meghalaya hi.
Halor jingïalang jong ki ar Chief Minister Meghalaya Assam kaba long haka 30.9.2023 baki rai ban pynkynriah ïaki pulit Assam bad Meghalaya bad ban bujli pat daki CRPF, ka Forum kam pyrshah ïakane ka rai jong ki hynrei ka kynti bad ai jingmut ïaka sorkar ba kam dei ban pynkynriah ïaki pulit jong ka jylla ruh namar ba ki CRPF ruh ki bun ki Dkhar bad kiba control daka Sorkar Assam da u Himanta Biswas Sharma.
Kumta ka bha ba ki polit jong ngi ruh kin donlang bad ïatrei lang khnang ba ki briew jong ngi kin kham sngew sngaiñ namar kiba bun ki pait nongshong shnong jong kane ka shnong sngewthuh ïaka ktien ka thylliej ong ka Forum.
Ïaki mat ïa pynbeit pud pat ka Forum ka ai jingmut ba ym dei ban pynleit jingmut lane ïakren shwa ïaka Psiar bad Khanduli Sector. Namar lada pynleit jingmut shwa ïaka Psiar bad Khanduli te ngi lah ban duh noh ïaka Block bad ka long ruh kumba tynsah prek ïaka Block-1 shapoh Assam, wei bala ïabeit ïaka Psiar bad Khanduli te ka eh bha ban ïakren pat ïaka Block-1. Ka bha ban ïakren shwa ïaka Block-1 bad ynda wan ka Block -1 sha Meghalaya te kine ki Psiar Khanduli kila wan lypa hi shapoh Meghalaya bad kane kan pynsuk bad sting ïaka sorkar ruh.
Ka Forum ka kyrpad ruh ïaka sorkar ba haka jingleit jngoh leit jurip jong ki ïaka Block-1, kimdei ban leit tang ha Khanduli Mukroh Psiar lane shaki shnong ba marjan hynrei ki dei ban leit shaduh shaki shnong kiba kyndong tam bad kiba kut jong ka Block-1 kiba dei ban re-transfer biang sha Meghalaya.
