Shillong, Risaw 1 : Ka tnad ba peit ïa ki khlaw ki btap ha ka jylla bad ki sawdong sawkun ka mariang ( Forest and Environment) ka khlem pyndonkam satia ïa ka pisa ba 102.02 klur tyngka kaba dei na ka fund ba la tip kum ka Meghalaya Minor Mineral Reclamation Fund (MMMRF) bad kane ka pisa ha ka jingshisha ka dei na ka bynta ban pynbha bad peit kumno ban pyndap bad thung dieng biang ïa kito ki par mar poh khyndew kiba la shu ïeh kumto ne kiba shu tih tuh ïa u mar poh khyndew la ka dei u dewiong, mawshun maw, shyiap bad kiwei kiwei.
ïa kane la pynpaw ha ka kaiphod Comptroller and Auditor General of India (CAG) ha ka jingbud dien jongka ïa ki jingpyntreikam ïa ki pisa tyngka ha ki tnad bapher bapher jongka sorkar jylla kata kat haduh ka 31 tarik Lber 2022.
Kat kum ka kaiphod la pynpaw ba kat kum ka jingkheiñ jingdiah ba la ai da u PCCF bad HoFF ka pisa hapoh ka fund MMMRD kaba don ha Bank kat haduh ka 31 tarik Lber 2021 ka long 102.02 tyngka.
Ka pisa ba la pyndonkam ka long tang 0.07 klur tyngka kata ha kaba siew bai bylla ïa ki arngut ki nongtrei kontrak kiba la thung ban ïarap ïa u Secretary ka Meghalaya Minor Minerals Reclamation Fund Committee. Ym don kano kano ka jingpynlut ban ïada ïa ka mariang na ki jingshah pynjot pynpra. Nalor kata khlem lah ban pynpaw ruh na kaei ka daw khlem lah ban pyndonkam ïa kane ka pisa ba la mang na ka bynta katei ka kam.
Ka tnad ka shu pynpaw ba ïa ki jingkdew jingpyni kumno ban pyndonkam ïa ka fund dang shu dep pynmih ha u Iaiong 2022 bad na kata ka daw khlem lah ban pyndonkam ïa kane ka pisa.
Kat kum ki jingkdew jingpyni kyndon jong ka tnad Forest and Environment ha ka jingpynbna ba la pynmih ha ka 8 tarik Iaiong 2022 ïa kane ka pisa MMMRD yn pyndonkam ha kaba shimti, pynbha bad thung dieng biang ha kitei ki jaka ba tih mar poh khyndew la ka dei kiba la shu ïehshrah ne kiba shu tih beaiñ ruh. Nalor kane dei ruh ban ïada bad thung biang ïa ki dieng kiba la shah pynjulor ha ki bor mariang ne ha ki mrad ki mreng ruh. Da kane ka pisa ka Committee ka lah ruh ban thaw ki lad kil ynti kumno ban khang lad ïa ka jingtih marpoh khyndew beaiñ. Nalor kata ka don ruh ka jingduh nong jongka MMMRF kaba haduh 14.51klur tyngka namar ym shym la shim khia da ka tnad.
Kane ka pisa ka dei ban ïoh na ka jingtih ïa u maw bad shyiap kumba la buh da ka PWD kata haduh 10 %. Hynrei ym shym la paw ba ki DFO ki leh ei ei halor kane.
