Tuklar lem mardor, kyntu u MDC Tura ïa u CM na bynta ka jingmyntoi ki longïing ba duk

Shillong, Risaw 01 : U MDC ka BJP na Tura, u Bernard N Marak ha ka sngi U Blei u la kyntu ïa u Myntri Rangbah ka Jylla, Conrad K Sangma ba un tuklar lang na ka bynta ban pynjanai ïa ka rukom treikam khnang ba ki longiing ba duk kin ïoh pura ïa ki jingmyntoi naki skim jong ka sorkar pdeng khlem da peit shilliang khmat la ki don ha kano kano ka seng saiñpyrthei.
Ha ka shithi sha u Myntri Rangbah, u Bernard u la ong ruh ba u la wan jurip kylleng ki block jong ka West Garo Hills bad u lap ba jan baroh ki Block ki la dep ban pynïasoh sha u Aadhar.
“Hynrei ka jingpynïasoh ïa u Aadhar bad ki bank ka dang shim por namar katkum ka jingïoh jingtip ka daw ka jingslem kadei na ka jingduna ki nongtrei, ka bording bad ruh ka jingbym bïang ki kor ki bor internet, kaba nga ngeit ba lah ban pynbeit da ka jingbthah na ka ophis jongphi. Ka sorkar ka lah ban bthah ïa baroh ki nongpynbiang ïa kiba pynïaid ïa ki network mobile bad ruh ïa ki bank khnang ba yn dup lah ban pyndep noh ïa ka jingpynïasoh Aadhar ïa baroh khnang ba ki paidbah kin ym duh ïa ki jingmyntoi,” u la ong.
Katkum ka jingong jong u, katei ka jingbym biang ka la ktah ruh wat ïa ki samla pule kiba ap khmih lynti ban ïoh ïa ka scholarship.
Ha kajuh ka por u la kyntu ruh ïa u Myntri Rangbah ba un kyntu ïa ki mobile company ba kin pynbha ïa ka jingshakri jong ki namar mynta wat ïa ka jingwan trei jong ki ha ka skim NREGA ruh la hap ban pynrung online kaba lada ym lah ban kyntiew online ki paidbah kin sa duh ïa ka bainong trei ha ka VEC.
“Nga kyrpad ba phin mang katto katne ka pisa na ka bynta jingpynshai paidbah halor ka jingpynïasoh ïa u Aadhar bad ban pyndep noh ha shwa ka 31tarik Nohprah, 2023 lym kumta kin sa duh lut ki jingmyntoi,” u la ong.
Haba ïadei pat bad ka jingduna ki nongtrei kaba ki block ki kynduh, utei u MDC u la kyntu ïa u Myntri Rangbah ba un thung briew noh ha kito ki kam kiba lait thylli kum ki gramsevak bad kiwei ki kam bad ruh ban pynbiang ïa ki jingdonkam ha baroh ki block kynthup naduh ki ophis ïa ki assistant engineer, agriculture officer bad kiwei kiwei.
U ong ruh ba kitei ki block kim don ïa ki jaka treikam kiba biang na ka bynta ki ophisar ban treikam kaba la buh jingeh haduh katta katta ïa ki nongtrei ban treikam bha bad pyndep ïa ki kam ha ka por kaba biang.
Haman ki block ki don beit la kumno kumno 15 tylli ki gramsevak circle hynrei ki don duna pat ki gramsevak kiban peit ïa ki kam ha ki GS circle. U ong ruh ba ki sngew lyngoh ban ïoh ba don ha ki block ba ki gramsevak kynthei ki hap ban leit peit ïa ki kam sha ki jaka ki bym ïahap shuh bad ka bor jong ki.
“Ha baroh ki block, ki nongtrei ha ka Rastriya Gram Swaraj Abhiyan (RGSA) kim pat ïoh satia ïa ka tulop na ka bynta 6 bnai. Kumta nga kyrpad ba phin shimkhia ïa kane ka bynta ruh bad ki department ban weng ïa kane ka jingeh kaba kynduh da ki nongtrei,” u la bynrap biang.
Nalorkata, u kyntu ruh ïa u Myntri Rangbah ban peit halor ka jingbym lah jong ka sorkar ban pyllait ïa ka mang pisa kaba dei sha ki paidbah lyngba ka block. U la ong ruh ba ha kiba bun ki block bun bha ki jingeh ha kaba ka jingsiew ïa ka bai tiar bai tar kim pat ïoh haduh mynta watla ka sorkar pdeng ka la dep ban pyllait. U ong ruh ba watla ki paidbah ki la dep ban trei 100 sngi hynrei ka jingsiew kaba ki ïoh ka duna na kaba ki trei bad kane ka pynlong ïa ki ban pyrkhat ba ka sorkar pdeng ka khlem pat pyllait ïa ka pisa.