Hukum ka Tnad Animal Husbandry ïala ki Nongtrei ban pyni ID haba talasi kali masi

Shillong, Jymmang 09: U Myntri ka Tnad Animal Husbandry & Veterinary Bah Sanbor Shullai hynne ka sngi nyng kong, ula bthah ïa ka Tnad ba kin hukum ïala ki jong ki Nongtrei kiba ap ïa ki Check Post (khydrop talasi kali masi) ba kin pynithuh noh ïalade haba talasi ïa ki kali kit masi ba wan rung sha Jylla.
Kane ka jingbthah kala mih hadien ka jingujor na ka seng Khasi Jaiñtia Butchers Welfare Association (KJBWA) bad ka Meghalaya Butchers Association (MBA) ba jur ka jinglum pisa be-aiñ ha ki khyrdop talasi kali kit masi bad sniang ha Umling Check Post.
U Bah Sanbor ula ïathuh ba ka KJBWA bad ka MBA kila wan ïakynduh ïa u hynne ka janmiet bad ujor ïa kane ka jinglum pisa be-aiñ ha ka khyrdop jong ka Tnad kaba don ha Umling ha ka jingiadon ryngkat ki Heh Ophisar jong ka Tnad.
U Ban Sanbor u pyntip ba ka Tnad kan sa bthah mynta ïa baroh ki briew kiba ap ha ki khyrdop (check post) ba kin pynithuh noh ïalade nangne shakhmat da kaba deng ïa ki kynja ID khnang ba ki nongkhaii kin dup lah ban ithuh mano kiba donkti ban lum pisa be-aiñ.
Ha kajuh ka por, u Myntri ula kyntu ïa ki nongujor ba kin wanrah ïa ki sabut lada ki don haba ïadei bad ka jing kynnoh jong ki khnang ba ka Tnad kan ïoh leh ïa kaba donkam ne wat ban ujor ejahar la ka dei ïa ki Nongtrei ka Tnad ne ki Pulit kiba iarap pahara.
“Kumba long mynta hi, ngim lah ban tip mano ba donkti namar haba ngi kylli ruh ïa ki nongujor, ki ruh ki ong ba kim tip ne ithuh. Kumno ngin shim ïa ka sienjam ban pynshitom ïa kiba donkti lada ngim ithuh mano ba donkti” ula ong.
“Nga la ai jingmut ruh ïa ki ba kin ring noh da ki video lane record ïa ka jingïakren haba shah dawa pisa khnang ba ka tnad kan lah ban leh eiei bad ujor ejahar ” ula bynrap..
Haba pynpaw ba ki Nongkhaii ki don ka hok ban tip mano ba talasi ïa ki kali jong u, u Principal Secretary ka Tnad u GHP Raju ula ong “Ki Nongtrei ba don ha ki khyrdop kin hap deng ïa ki ID jong ki kumba leh ki Pulit namar ngim tip mano ba lum pisa, la ki dei ki nonglute, ki nonglum pisa be-aiñ ne ki riew runar”.
Kat kum ki jingkynnoh kiba mih la ïathuh ba kane ka jinglum pisa be-aiñ kam dei satia ïa ki kali kit masi/sniang kiba don ïa ki Transit Pass (TP)jong ka Tnad Animal Husbandry & Veterinary hynrei ka dei ïa kito ki kali kit masi/sniang kiba ïaid khlem ka TP. La ong ba kine ki khyrdop kila lum T. 1000 ïa kawei ka masi bad T. 500 ïa u sniang lada ki kali kim don ïa ki TP ban wanrung sha Jylla Meghalaya.
“Lada don ki Nongtrei jong ngi kiba dawa pisa haba talasi ïa ki kali jong ki Nongkhaii, sngewbha ban pyntip sha ka Tnad ryngkat ki sabut khnang ba ngin lah ban ujor ejahar (FIR) pyrshah ïa ki briew ba donkti bad ban ai ka jingpyn shitom” ong u Raju.
Haba pynpaw ba ka jingpynieng ïa ki khyrdop ka long ban iarap ïa ki nongkhaii, une u Heh Ophisar ula ong “Ka Director General of Police (DGP) kala ai ka jingbthah kaba shai bha sha baroh ki Superintendent of Police ba kin iarap lem ïa ki kali ba don TP ban wan rung sha Jylla. Ngi don hangne ban iarap ïa ki Nongkhaii hynrei lada don kiba pynduk ïa ki, ngin leh da kaba tyngeh pyrshah ïaki” ula ong.
Halor ka jingkiew dor ka doh masi, u Raju u pyntip ba ula bthah ïa ka Tnad ban leit lum jingkheiñ na baroh ki nongdie doh masi ha baroh ki 46 tylli ki C&RD Block bad 12 tylli ki District Headquarter ka Jylla ban lah pynianujor ïa ka dor ka mur.