Shillong, Nailur 29: U myntri ka tnat DoNER ka sorkar pdeng u G. Kishan Reddy hynne ka sngi ula pyllait paidbah ïa ka 5G Applications ha 7 tylli ki jylla ka thaiñ shathei lammihngi kynthup ka Meghalaya bad lait noh ka Arunachal Pradesh, ha ka jingïalang ba la long hapoh ka Tech City, Bongora Guwahati, Assam.
Ki Myntri sorkar ba don lang ha kane ka sngi ki kynthup u Myntri rangbah ka jylla Arunachal Pradesh u Pema Khandu, u Myntri Rangbah ka Sikkim u Alo Libang, ka Myntri ka tnat ka koit ka khiah Meghalaya kong Ampareen Lyngdoh, u Myntri ka tnat ka koit ka khiah ka Arunachal Pradesh u Lorho Foze, u MP Ritu Barman Sarmah, u Vice Chairman ka AMPRTON u Syeddin Abbasi, u Additional Chief Secretary ka tnat Telecom ka sorkar India u Rajaraman.
ïa kane ka 5G Applications la pynwan dur daka AMPTRON haka jingïatreilang bad ka tnat DoNER, ka tnat Telecommunications ka sorkar India, ka Telecom Sector Skill Council, School of Planning & Architecture, New Delhi, ka Vardhaman Mahavir Medical College & Safdarjung Hospital New Delhi, ka Design Innovation Center, UIET, Punjab University, ka ALIMCO jong ka tnat Ministry of Social Justice & Development, Government of India.
Lah ban kdew ba ha ka 22 tarik Nohprah 2022 u Myntri Rangbah duh ka ri u Narendra Modi lyngba ka juk Online ula pyllait paidbah ïa ka 5G application ha ka jingrakhe Golden Jubilee jong ka North Eastern Council kum ka jingthmu ban kyntiew ïa ka ïoh kam ïoh jam ki samla ka ri bad ban kyntiew ïa ka ïoh ka kot ha baroh kawei ka thaiñ.
Haba kren ha kane ka sngi u G. Kishan Reddy ula ong ba kane ka jingpyllait ïa ka 5G Applications ha 7 tylli ki jylla ka thaiñ shatei lam mihngi ka dei namar ka jingïohi jngai u Myntri Rangbahduh Narendra Modi ban kyntiew ïa ka Digital Economy jong ka ri.
U G Kishan Reddy ula ong ba kane ka 5G Application kan nang ïalam ïa ka ri shakhmat eh haba ïadei bad ka jingpynrung ïa ki Aadhar, United Payments Interface (UPI) bad Digilocker naka bynta ban kyntiew ïa ka ïoh ka kot ha ka juk kaba mynta lyngba ka juk Online.
Ula ïathuh ba ka NEC ka la bei 100% na ka bynta ban ai jinghikai pyntbit ïaki samla haba ïadei bad ka 5G Training Labs bad 5G Health Use Case applications ha baroh 8 tylli ki jylla ka thaiñ shathei lam mihngi.
