Wan ïashim bynta shitrhem ki nongrep ha ka tamasa pyninam ïa u Shynrai Lakadong

Jowai, Jymmang 09: Ki nongrep na ka thaiñ Laskeiñ Block jong ka West Jaiñtia Hills District mynta ka sngi kila poi sha ka tamasa bala tip kum ‘Lakadong Festival’ bad pynkut lashai ka sngi ha madan Pamsna Laskeiñ ïa kaba la pynlong da ka ophis ka Directorate of Horticulture bad ka Meghalaya Basin Management Agency jong ka sorkar jylla.
Kiba buh na ki kynhun jong ki nongrep SHG na katei ka thaiñ kila mih shit rhem sha kane ka prokram ban pynpaw pyrthei shapang ki lad bad ki jingmyntoi kiba lah ban ïoh na une u Synrai Lakadong uba dei trai na katei hi ka thaiñ (origin), na ka liang ki nongrep ha kane ka sngi ki la pynpaw pyrthei shaphang ka rukom rep ïa une u mar.
Kawei na ki nongrep katei ka thaiñ kala im ja na utei u mar rep ka kong Pdiangjingshai Hun Dkhar kaba dei na ka shnong Saphai kaba don ïa ka kynhun Iakyntulang SHG kala ong naduh ka dang rit kala hap ban im ha ka kam rep ban pyndap ïa ka ïing ka seng.
Hynrei lyngba ka jingwan jong ka ‘Lakadong Mission’ kane ka kam rep ka la sdang ba kylla dur bad ha ka juh ka por kala wan rah ruh ka jingmyntoi ha la liang ka ïoh ka kot bad ka jingdap ha ka ïing ka sem.
Katei ka kong Dkhar kala sdang ïa kane ka kam rep ïa u synrai Lakadong da kaba pynmih tang 530 kilo ha u snem 2019-20, katba ha u snem 20-2021 kala lah ban rep noh sha ka 1500 kilo bad haduh mynta ka la lah ban pynmih ïa sying haduh shitrok.
Shuh shuh kala pynsngew mynshwa kala hap ban leit trei bylla sha ïing ki briew hynrei naduh ba la shim ïa kane ka kam kala ïoh lad pynban bad ai kam ïa kiwei de ki nongrep kiba la don mynta haduh 11 ngut hapoh ka kper rep jong ka kong Dkhar.
Kala kyntu ïa kiwei de ki nongrep ka thaiñ ban kin shim ïa kane ka kam rep sying Lakadong bad kum ki nongrep dei ban ïa kynduh shibun ki jingeh haduh ban poi sha ka thong.
“Mynshwa nga la hap ban peit ïa ka kam rep jong kiwei hynrei naduh ba la trei ïa kane ka kam rep kiwei pat ki para nongrep kila phai khmat sha kane ka kam rep kaba lah ban pynïoh shibun ki jingmyntoi” ong shuh shuh ka kong Pdiangjingshai.
U Project Manager ka Meghalaya Basin Management Agency bah Sywell Lyngdoh ula ong ba une u Synrai Lakadong ula lah ban pynim ja ïa kiba bun ki nongrep namar ka jingdon jong ka Curcumin jong une u mar na kane ka thiañ kala poi sha ka 12 Curcumin.
Ka jingeh ka long kum ki nongrep ka thaiñ haduh mynta ‘kim tip katno ka jinglah jong ki ban pynmih ïa une u mar bad ka rukom pynïaid ïew ïa u ruh kam long kaba biang namar don ki nongrep kiba die tad shu dep rep bad kaba lah ban ïapher ïa ka dor die ïa u na uwei sha uwei pat.
Ula ong ba ka jingpynlong ïa kane ka tamasa ka long shi bynta ban wan rah shi jaka ïa ki nongrep, ki Self Help Group (SHG) bad kumjuh u (CMC) ne Collective Marketing Center ban ithuh shuh shuh ïa une u mar rep bad ha ka juh ka por ban ïa phylliew jingmut lang halor kumno ban pynneh pynsah ïa ka jingbha jong une u mar rep.
La ïathuh ba kane ka tnad rep kan pyrshang katba lah ban pynïaid ïew ïa u mar ha kylleng ki jaka namar ïa une u mar rep naduh ki samla pule kila wan ban wad bniah ïa ka jinglong jingman jong u namar u dei trai na kane ka thaiñ.
Mynta ka sngi 9 tarik kala don ka jingïakop rwai tynrai shaphang utei u mar rep, ka jingtes ïa ka jingbha u synrai, ka jingïakop Fancy Dress, ka jingïakop ah Synrai bad kiwei de.
Ïa kane ka tamasa yn pynkut lashai ka sngi 10 tarik ha kaba u Myntri Rangbah ka jylla u Conrad K. Sangma um wan ban plie ïa ka Lakadong Turmeric Collective Marketing Center (Synroplang Village Organisation) ha Thadmuthlong A, kumjuh ha Shangpung Pohshnong bad plie ïa ka Prime HUB, la ïathuh ba ïa kane ka Lakadong Festival yn pynkut da ki prokram pynbyrnia kum ka ‘Musical’ ha ka por janmiet.