Lada dei prah West Bengal ym shan slem – kob u Bah Pynïaid ïa ka VPP

Shillong, Nailur, 27: U MDC ka Sohryngkham ba dei ruh u CEM ka KHADC Bah Pynïaid Sing Syiem ha ka sngi Balang u la ong ba hadien ka jingrem jong u ha ka elekshon MLA ba dang shu lah shen ka pynlong ïa u ban wad ïa ka daw namar baroh ki lyngoh bad kyndit lut.
Haba kren bad ki lad pathai khubor, u la ïathuh ba hadien ki lap ba ka don ka jingïatrei lang hapdeng ka TMC bad VPP ha katei ka elekshon ha kaba ka TMC ka phah ïa ki briew jong ka ban kyrshan noh ïa ka VPP ha Mawryngkneng. “Kaba ar pat ka long kumba ïathuh baroh baroh ki briew kadei namar ka jingrwai,” u la ong.
Nalorkata, u la ong pat ba ha rilum namar ka VPP kam don kumta ka jingïakhun kadei beit tang hapdeng ka TMC bad ka NPP.
Da kaba kynnoh ba kitei baroh ki dei tang ki dur bula, u Bah Pynïaid u la ong ba ha ka elekshon ban wan ki sngew tikna ba ka NPP kan wan biang ha ka bor namar mynta ki la dep tip ïa ki nongïakhun pyshah. “Lehse lada dei u prah Khasi ka lah ban don ka jingïakhun hynrei lada dei u prah West Bengal kin ym shan slem bad ka NPP kan wan phai bïang ha ka bor,” u la bynrap biang.
Shuh shuh u la ïathuh ruh ba mynta tang hadien khyndiat bnai ba dep ka elekshon bun ki paidbah kiba kyrshan ïa ka VPP ki la wan ban kynduh ïa ki namar ki sngewthuh ba lada ki neh hajuh ym poi shaei shaei ruh.
“Lada kren kumno kumno ruh ym dei tang ka VPP kaba ieid Jaidbynriew hynrei ngi ruh ba don ha ka NPP ngi ieid Jaidbynriew da ki kam ban ym ban shu hylla ha surok lane pynlong jingïalang hangne hangtai,” la bynrap biang utei u rangbah.