Pan ka ïing Bishar HC ïa ka kaiphod CAG bym lah kem ka sorkar ïa ki trok kit palat pud

Shillong, Nailur 27 : Ka Iing Bishar High Court jongka jylla mynta ka sngi Balang, ka la bthah ïa ka Sorkar Jylla ba kan aiti ïa ka kaiphod jong ka Comptroller and Auditor General (CAG) halor ki jingbym biang ha ka jingtreikam jong ki Weighbridge ha ka Jylla kaba lam sha ka jingbym lah kem ïa ki trok kiba kit palat pud.
Haba shong bishar ïa ka PIL, ka Division Bench ka la ong “Watla ka Jylla haba kdew ïa ka hukum ba 23 tarik Nailar, 2023, ba la pynmih ha ka PIL No 1 of 2022, la paw ba ka don ka jingleh bym biang kaba khraw bha ha ka rukom treikam jong ki Weighbridge ha ka Jylla bad ka jingbuh jingkylli halor ka jingbym lah kem ïa ki trok ba kit palat pud ba la kdew ha ka kaiphod ba dang shen jong ka CAG”.
Ka la ong namar kane, la aibor ia u nongmudui ban pynshisha bad ban pynpaw ïa ki jingduna jong ka Sorkar Jylla ha ka sngi ba shong bishar biang ïa ka mukotduma ka ban long hadien lai taiew.
“Ka Sorkar Jylla ruh kan aiti ïa ka kaiphod jong ka CAG kat kum ki sla bala thoh halor kane ka kam” ong ka ïing Bishar.
ïa ka kaiphod CAG la wanrah ha ka Dorbar Synrai ba dang shu kut jong ka ïing Dorbar Thaw Aiñ ka Jylla, kaba pynpaw ba ka Tnad Transport kam shym la lah ban lum ïa ka khajna kaba kot haduh T. 23.75 klur.