Pynkup burom ka KSU ïa ka samla Evangel Pohplet kaba jop ha ka National Boxing Champion

Jowai, Jymmang 09: Ka Khasi Students Union (KSU) War Jaiñtia Circle mynta ka sngi ka la pynkup burom ïa ka samla Evangel Pohplet iba dei na ka Shnong Syndai War Jaiñtia kaba la wanrah ïa ka nam ka burom ïa ka thaiñ baroh kawei bad khamtam ïa ka Ri bad Jaitbynriew.
La ïathuh ba ka Samla Evangel Pohplet kala ïoh khur ïa ka jingjop ha ka National Boxing Champion 2022 kaba la long ha Jaipur da kaba ïoh ban rah ïa ka khusnam Title Belt bad kumjuh ka Best Female Boxing Champion of India.
Ka Evangel Pohplet ka dei ka samla kaba wan na ka longïing baduk hynrei kala trei shitom bha miet bad sngi ban poi shaduh kane ka thong ban wanrah ïa kane ka nam ka burom ha ka ïing ka sem bad ka thaiñ hi baroh kawei.
Ha kane ka jingpynkup burom la pynïaid da u samla Lurman B Talang General Secretary bad la ai ka jingkren maitphang da u Samla Platini Mukhim uba dei u Publicity Secretary, uba la ong ba ka sorkar kam ju don por ban peit ne ïarap ïa ki samla ba don ka sap ka talent khnang ba kin lah ban kiew shaphrang ban wanrah ïa ka nam ka burom ïa ka jylla hi baroh kawei.
Ha kane ka program la donlang da ka samla Ladaplyn Hayong ha ryngkat bad u Officer Incharge Amlarem Police Station bah Sandy Manner uba la ai ruh ka jingkren bad ïaroh ka jingtrei shitom ka samla Evangel Pohplet ba ka long ka jingsngew sarong ïa ka jylla hi baroh kawei halor ka jingwanrah jong ka ïa ka nam ka burom.
U la kyntu kynpham bad ai ka jingsneng jingkraw sha baroh ki khynnah samla ba ki dei ban trei shitom bad minot khnang ba kin lah wanrah ïa ka nam ka burom ha ka thaiñ hi baroh kawei. Ka Seng hala i bor barit kan ïaleh shitom ban ai ka jingïarap ïa kane ka samla kaba la wanrah nam ïa ka Ri bad Jaitbynriew.