ïaroh u Bah Hek ïa u nongïalam ka BJP ba thung ïa u Rikman kum u President ha Meghalaya

Shillong, Nailur 26 : U MLA ka BJP uba dei ruh u Myntri jongka sorkar MDA u bah A.L Hek mynta ka Sngi Ba Ar u la ai ka jingïaroh ïa ki nongïalam ka BJP na Delhi kiba la shim ïa ka rai ban thung noh ïa u Rikman Momin kum u President ba thymmai ka party ha Meghalaya.
“ Ka Party jong ngi ka la leh ïa kaba dei eh ban shim ïa kane ka rai ban thung ïa u President ba thymmai u Rikman G Momin namar u dei uwei na ki dkhot ba la rim bha jongka party. U dei uba la ju ïakhun teng ïa ka election MP na Tura wat la u khlem jop ruh ha u snem 2019 bad u dei ruh u dkhot jognka National Council ka BJP la kumba arsnem tam ei ei mynta. Kumta u la dei hok bha ban ïoh ïa kane ka shuki President jongka party ha kane ka jylla” ong u bah Hek haba ïakren bad ki nongthoh khubor.
Ki tyllong khubor na ka BJP hi ki ïathuh ba bun ki nongïalam ki la ïoh pdiang ïa kiba bun ki jingshah ujor pyrshah ïa u bah Ernest Mawrie bad lehse dei na kane ka daw ba ki nongïalam na Delhi ki rai ban weng noh ïa u na ka shuki President.
Kane ka rai ka la jia ruh tang hadien katto katne sngi ba uwei u nongïalam ka BJP u bah Himalaya M Shangpliang u la mih noh na ka BJP bad pynïasoh sha ka NPP da kaba u kynnoh ba dei na ka daw ka jingleh shilliang palat jong u bah Mawrie.
Katba u bah Hek pat u la kyntait halor kine ki jingkynnoh da kaba u ong ïa kane ka rai la dei ban shim la kham slem hi bad ka dei ka por kaba biang eh ba ki shim ïa kane ka rai ba mynta.U la ong ruh ba kane ka rai na Delhi kam don jingïadei ei ei ruh bad ka jingrung jingphet jong uno uno u dkhot. “ Ka la dei hi ka por ha ka jingshisha la dei ban leh naduh mynshwa namar ka por jong u bah Mawrie ka la kut naduh shwa ka election MLA. Kumta la dei hi ban jied ïa u President ba thymmai ha kane ka jylla. Kumta u la ong biang ba kam dei satia ka jingphet ne mih noh jong uno uno ruh u dkhot” ong u bah Hek.
U la ong ki jingujor bad jingpyrshah ki ju jia beit, “ Lehse ki don kiba ujor pyrshah ïa nga ruh lada ngam lah ban leh ïa kaei kaba ki kwah kane ka dei shi bynta jongka jingim kumta kane ka jingweng kam dei satia ba shah ujor hynrei ka la dei hi ka por ban jied thymmai ïa u President” ong biang u bah Hek.
U la ïathuh ba ka dei ka jingshisha ba ka kyrteng jongu ruh ka paw na ka bynta kane ka shuki President jongka BJP ha kane a jylla tangba ka BJP ka bat ïa ka nongrim kata ka dei uwei u briew kawei ka kam. U la ong ruh ba kane ka rai ban jied thymmai ïa u President kam dei satia ba ki nongïalam ki kwah ban pynhun ne pynsngewtynnad ïano iano ruh.
“ Ka Party ka la shim ïa ka rai ban pynsngewtynnad lut ïa baroh tangba ban pynsngewtynnad lut ïa baroh ruh kan ym lah long hi namar ka long kaba eh ban pynhun ïa baroh wat tang ha ka ïing ka sem ruh ka ju jia hi kumta katno tam kat ka BJP kaba don ha baroh kawei ka jylla” ong u bah Hek.