Shillong, Nailur 26: Ka National Book Trust, India ryngkat ka jingïatreilang ka sorkar Meghalaya ka pynlong ïa ka Shillong Book Fair naduh ka 27 tarik mynta u bnai haduh ka 3 tarik u Riasaw 2023 ha State Central Library Shillong.
Katkum ka jingïathuh u Yuvraj Malik jong ka National Book Trust bad u Pravin Bakshi, ophisar ka sorkar jylla, la ong ba kane ka Book Fair kin don bun ki jait kot ba la thoh da ki nongthoh kiba pawnam, ha kaba ki khynnah skul, ki samal pule bad kito kiba ju smat ban pule kot ki lah ban thied ha ka dor kaba kham jem.
Kumta na ka liang kine ki rangbah, ki khot ki wer ïa ki paidbah ba kin shim kane ka kabu ban wa sha kane ka jingpyni nam ïa ki kot, ha kaba kin don ruh ki jingïathuh khana, ki jingpyni nam ïa ka kolshor, ki jingrwai bad kiwei kiwei de ki prokram.
