Inter District Cricket: Pynliem kput ka Shillong Cricket Association A ïa ka East Jaintia Hills DCA
Khyrwit spah ron tam u Avinash, san wicket khur u Ayushman.
Shillong, Nailur 26: Ka kynhun lehkai jong ka Shillong Cricket Association A ka la khur ïa ka namjop pyrshah ïa ka East Jaintia Hills District Cricket Association haduh 248 ron ha ka jingïakhun ka jong ki na ka Zone 1 jong ka Group A ha kane ka lympung lehkai Meghalaya Cricket Association’s U-19 Boys Inter District Cricket Tournament kaba la long ha Umbuda, Nongpoh, hynne ka Sngi Hat Majai.
Haba tied nyngkong tang mar ïa jop ïa ka toss, ka kynhun lehkai jong ka SCA-A ka la khyrwit haduh 348 ron shuwa ban shah pynhap baroh na ki 39.4 over bad hadien nangta pynhap baroh ki wicket jong ka EJH da 100 na ki 26.1 over.
U Avinash Rai u la long u rangtied u ba la seisoh tam ha kane ka jingïakhun, ha kaba u la kynjoh sha ka spah ron tam (century) da kaba khyrwit 150 na ki 108 bol na ka inning kaba kynthup ïa ki 24 tylli ki four bad hynriew tylli ki six.
U la ïoh ban ïarap 129 ron shuwa ban shah pynhap ïa u wicket u ba ar ha ka jingïalong paralok bad u Pushkar Raj, u ba la kyrshan lyngba ki 67 ron na ki 58 bol (8x4s, 2x6s) kiba u la ïoh ban kamai. Ki la don ruh katto katne ngut ki player kiba la ïarap ban kyntiew ïa ka ron na bynta ka kynhun, kiba kynthup ïa u Shavian Blah u ba la kamai 24 ron na ki 16 bol, bad ka 38 ron na ki 13 bol na u Angkit Tamang.
Napdeng ki rangkawangbol, ym shym la lait u wei ruh u bym shym la shah khyrwit phew ron ha ki nongtied ka Shillong Cricket Association A, hynrei ki la don katto katne kiba la seisoh. U Dev Rai u la khur 3/46 bad u Bitu Lama 3/57. U Avinash u ba la kamai bun ron tam na bynta ka Shillong Cricket Association A u la shah pynhap noh ha u Jeffre Chyrmang (1/68).
Haba donkam ban kamai palat 8.73 ron man ka over khnang ban jop, ka EJH ka la sdang da kaba jaijai ryngkat bad ka kamai ron, bad ka la ïoh ban kynjoh sha ka 45-ron tang na ki arngut, u Amarjeet Gupta (31) bad Jeffre (27). Hynrei ka la shem jingeh hadien ban ïaid lait na ki bol kiba ma na u Ayushman, u ba la pyndep ïa ka inning da 5/19.
Haba kut jong ka jingïalehkai, u Avinash u la ïoh ban khur ïa ka nam Player of the Match, katba u Ayushman u la ïohpdiang ïa ka khusnam hadien ba u la lah ban lehkai bha ha ka bowling.
Mynta ka sngi kan long ka jingïalehkai kaba khadduh na ka Group Stage, ha kaba ka SCA-B kan aireng pyrshah ïa ka Ri-Bhoi DCA na ka Zone1 jong ka Group A.