Shillong, Nailur 19: Ka Sorkar Jylla ka la ïoh haduh T. 135.08 klur ka pisa na ka Sorkar Pdeng naduh ba sdang pyntreikam ïa ka Pradhan Mantri Khanij Kshetra Kalyan Yojana (PMKKKY) kat haduh mynta mynne, ong u Myntri Rangbah ka Jylla Conrad K Sangma haba pyntip hapoh ka ïing Dorbar Thaw Aiñ ka Jylla mynta ka sngi Ba-ar.
Haba jubab ïa ka jingkylli ba la buh da u MLA ka UDP na Shella Bah Balajied K Synrem halor kane ka kam, u Conrad ula ïathuh ba ka Sorkar Jylla ka la ïoh haduh T. 9.67 klur ka pisa na kane ka skhim, kaba dei jong u snem 2022-2023.
Kat kum ka jingong jong u, ka skhim ba la pyntreikam lyngba ka PMKKKY ha Sohra ki kynthup ïa ka jingshna bha ïa ka jingpynpoi um sha Circuit House, Sohra Civil Sub-Division lyngba ka Pumping Water Supply Scheme ba thymmai na ka shyngiar ba marjan ba la tip kum ka Um Them Circuit, kaba long haduh T.21,80,600 bad ka jingtei ïa ka Rain Water Harvesting ïa ka Circuit House Sohra Civil Sub Division ba kot T. 31.65,000.
Halor ka kam ba ïadei bad ka District Mineral Foundation (DMF) Fund, u Bah Balajied ula pan jingtip la ki jaka tih par ba shah ktah ki dei kiba la buh hakhmat eh haba pyntreikam ïa ka song pisa.ïa kane, u Myntri Rangbah ula ong ba kat kum ki kyndon, ka jingithuh ïa ki jaka ba shah ktah ka dei kaba hap ban khmih bha.
“Kum ka kyrteng, kane ka dei ka District Mining Fund. Kane ka dei ka Trust kaba la khmih ha ka kyrdan jong ki District bad ki Deputy Commissioner ki dei ki Chairman ban leh screening bad ban mang ïa ki project bad ka Sorkar Jylla kam tuklar satia ïa ki kam ba ïadei bad ka jingjied ïa ki jaka ne mang ïa ka pisa” ula bynrap. U Bah Balajied ula pynpaw ruh ïa ka jingsngewkhia halor ka jingbym kynthup lang ïa ki MLA kum ki Dkhot ka DMF wat hapdeng ka jingtip ba kham bha ïa ki skhim kiba dei ban pyntreikam hapoh ka District.
U Conrad haba jubab, ula pyntip ba ka Sorkar ka la pynmih ïa ka jingpynbna ba thymmai ha ka 22 tarik Nailar 2022 ha kaba ki MP bad ki MLA jong ki District ki la shah kynthup kum ki Dkhot ka DMF. Ula kular ruh ba un sa pynkynmaw biang ïa ki bor Distrct halor ka jingdonkam ban pyntreikam ïa kane ka jingpynbna kumba ka dei ban long.
Ha kajuh ka por, u Myntri Rangbah ula kular ruh ba ka Sorkar Jylla kan sa pynmih ïa ka kaiphod ba shisien shisnem halor ka jingpyndonkam ïa kane ka song pisa.
Kane ka jingkular kala mih hadien ka jingkyrpad jong u Nongïalam ka AITC bad Myntri Rangbah barim ka Jylla Dr Mukul Sangma, uba la ban jur halor ka jingdonkam ban treikam haba shit haba shai haba pyndonkam ïa ka song pisa.
