La ar reng ban ban shah dung ka NPP ha ka UDP, yn ïakhaid ka jingïakhun ’23

Shillong, Jymmang 8 : Ka long ka sien ba nyngkong ba ka UDP kan ïoh ban dung ar reng ban ban ïa ka NPP tang hapdeng ar sngi. Kata ka long ha ka Sngi Thohdieng ha kaba da ki spah ngut ki nongtrei bad nongkyrshan ka NPP ha ka Nongpoh Constituency ki la phet bad pynïasoh sha ka UDP bad ha ka Sngi Saitjaiñ pat da ki spah ngut ki nongkyrshan ka NPP ha Lawsohtun kaba hap hapoh ka Mylliem Constituency ki la phet bad pynïasoh sha ka UDP hapoh ka jingïalam u MDC u bah Mitchel Wankhar.
Kumba paw ki dak ki shin kat haduh mynta hi hadien ba ka Congress kam don shuh wat tang uwei ruh u MLA namar 12 ngut ki phet sha ka AITC bad 5 ngut pat ki shah sospon bad kim pat pynïasoh shano shano ruh, ka jingïakhun haka election MLA 2023 kan long hapdeng ka AITC bad NPP ha kiba bun ki constituency ha ri lum Garo lait noh tang ha ki katto katne lehse ban don ka jingïakhun bad ka BJP, UDP bad Congress. Kumjuh ruh hangne ha ri lum Khasi bad Jaintia ka jingïakhun hi ha u 2023 kan long beit hapdeng ka UDP bad ka NPP.
Namar ka jingpynïasoh jong kito kiba phet na kiwei ki party ka long beit sha ka UDP bad NPP lait nangta ym pat ïoh sngew ba kin don kiba pynïasoh sha ka Congress ne kiwei kiwei ki party lait noh tang hangne hangtai eh ba don kiba pynïasoh sha ka HSPDP.
Kaba itynnad ka long ba baroh ki party ki don ha kane ka sorkar naduh ka NPP, UDP, BJP, Congress, HSPDP, PDF bad kyrtong shimet, kumno kin leit sha ki paidbah lada kiba bun ki mat ba ki kular kin ym treikam.
Na ka liang ka AITC mynta ka ïoh lad bha ban ther ïa ka NPP bad ia ka sorkar MDA namar ba ka don ha ka Liang Pyrshah da kaba kynnoh ba kane ka sorkar hapoh ka jingïalam u Conrad K Sangma kam shym la lah ban ai ka jinshakri hok sha ki paidbah la ka dei ha ka liang ka umdih, ka surok, pule puthi, jur ka jingdheng kali, ka jingkoit jingkhiah bad ter ter. Ka la kynnoh ruh ba kam don satia kata ka jingroi jingpar hapoh kine ki saw snem tam ba la synshar ïa ka jylla da ka MDA.
Halor kine ki jingkynnoh pat jongka AITC na ka liang u Symbud Myntri Rangbah ka jylla u bah Prestone Tynsong u la khyrwit kylla ba ka AITC ka dei ka party kaba dang shu wan ïuhkjat dang mynhynnin ha kane ka jylla kumta kam dei ban balaiñ than namar u la ong lada ka kwah ban tip ïa ki jingshisha ka dei ban leit tohkit na ki paidbah ba kin ïoh sngew da la ki shkor haduh katno ka sorkar MDA ka la lah ban ai ka jingshakri hok ïa ki paidbah da kaba u ai nuksa ba tang ha ki surok ka sorkar ka la dep pynlut ym duna ïa ka 6000 klur tyngka.