Da ka lieng kynda tong jaboh u Conrad Sangma ha Umsohlang, Kynton Massar

Shillong, Jymmang, 08: Kum ka jingsdang ban pyni nuksa ïa ki paidbah ba ki dei ban pynneh pynsah ïa ki tyllong um bad ïa ki um ki wah ha kylleng ka jylla Meghalaya baroh kawei, u Myntri Rangbah ka Jylla u Conrad Kongkal Sangma ha ka sngi Saitjaiñ u la hiar sha ka shnong Kynton Massar, Shillong ka shnong kaba don hapoh hapoh ka jylli jong ka shnong Mawlai ban pynkhuid ïa ki jaboh jabaiñ kiba tuid ha shilynter jong ka Wah Umsohlang, kaba long ruh ka shlem tan umbam umdih jong ka tnat PHE ïa kaba la tip kum ka Umsohlang Water Supply Scheme (UWSS).
Ka jingpynkhuid ïa kane ka wah, kaba ruh long ka tyllong sam umbam sha ki katto katne ki shnong kiba don hapoh ka shnong Mawlai, ka dei lyngba ka jingshimkhia jong Dorbar Shnong Kynton Massar kaba la thaw ïa ka Bio Diversity Management Committee ba la khlieh da u Rangbah Shnong u Dr. Marco Mitri ha ryngkat ka jingïatreilang bad ki Dorbar Shnong kiba don markhap.
Ryngkat lang bad u MDC jong ka Mawlai Constituency u Bah Teiborlang Pathaw lem bad u Rangbah Shnong jong ka shnong Mawdatbaki u Bah BR Kharmujai, u Myntri Rangbah u la tong ïa ki jaboh kiba per ha Umsohlang da kaba pyndonkam da ki tynsong.
Ka jingjaboh jong ka wah Umsohlang ka dei na ka jingtuid ki jaboh na ki thliew ing jong ki briew lyngba ki phud wah kiba wan na ka shnong Mawkynroh, Umshing, bad Mawroh.
Ha ka Wah Umsohlang, ki ju don bun ngut ki nongsait jaiñ kiba ju im kamai jakpoh da kaba saitjaiñ nong manla ka sngi bad ba ki paidbah ka shnong Kynton Massar ki ju sait ïa ki jaiñ ki nep manla ka sngi.
“Ngi la wan jngoh ïa ka Wah Umsohlang ban peit ïa ka jinglong jingman jong kane ka wah da kaba ïatreilang bad ki Dorbar Shnong ban pynthikna ba kane ka wah kan ïoh jingim bad kan long biang kaba khuid bad ba ki jingthaw ba im kin dup lah ban im biang ha kane ka wah,” ong u Myntri Rangbah ka Jylla u Conrad Sangma.
“Ngi la shim ruh ïa ka rai ban pynbna ïa ka Mission Mode Programme ka ban long kum ka Pilot Project ka ban long ka nuska ïa kiwei pat ki shnong bad ïa ki paidbah nongshong shnong hapoh ka Jylla lada ki shnong ki thaw bad ki kynhun bapher bapher lem bad ka Sorkar ki wan shakhmat ban ïatreilang ngin sa lah ban pynkylla ïa ka jingshah ktah ka mei mariang kaba ngi la pynjot pathar ïa ki khlaw ki btap, ïa ki um ki wah,” ong u Conrad.
“Lada ngin ïatreilang ngi lah beit ban jop,” la ong shuh shuh u Conrad.
“Ngi la shim ïa ka rai mynta ka sngi bad ki Dorbar Shnong ba ngin sa shong jingïalang ha ka taiew ban sa wan bad hapoh khyndiat por ngin sa wan phai biang sha kane ka jaka ban pynbna ïa ka Mission Mode Programme,” la ong shuh shuh u Myntri Rangbah.