Nga mih noh na ka NPP namar nga kwah ba ka UDP kan ïalam ïa ka jylla ha u 2023: Bah Mitchel

Shillong, Jymmang 08 : Ka United Democratic Party (UDP) ha ka sngi Saitjaiñ ka la pdiang burom ïa u MDC ka Laban Mawprem, Bah Mitchel Wankhar sha ka party bad pynbna ruh ïa u kum u kyrtong ban aireng ha kane ka elekshon MLA ka ban long ha u 2023 na Mylliem constituency.
Ha katei ka jingïalang pdiang burom ïa u Bah Mitchel kaba long ha Lawsohtun la don lang palat hajar ngut ki paidbah ryngkat ka jingdonlang u President ka Party ba dei ruh u Lamphang ka ïing Dorbar Thawaiñ ka Jylla, Bah Metbah Lyngdoh, u General Secretary Bah Jemino Mawthoh, MLA ka Mawkaiaw Bah Nujorki Sungoh, Working President Bah Paul Lyngdoh nalor ki MDC bad ki nongïalam jong ka party.
Haba kren ha kane ka sngi, u Bah Mitchel u la pynpaw ba ka daw kaba pynlong ïa u ban mih noh na ka NPP bad ïasoh noh sha ka UDP kadei namar u kwah ban ïohi ba ki party riewlum kum ka UDP ban ïoh synshar ïa ka jylla ha u 2023.
“Lehse phin lyngoh balei u Bah Mitchel u mih noh na ka NPP bad ïasoh sha ka UDP. Nga kwah ban ïathuh ïaphi, lai snem nga don bad ka NPP ngam don ka jingsngewtrai namar ki nongïalam ba hakhmat lada kim dei hi ki paradoh para snam, kiba ïa sngewthuh ka ktien ka thylliej ka long kaei kaei kaba eh ban long trai,” u la ong da kaba bynrap ba ha UDP pat u sngew trai bad u don ruh ka jingsngew skhem ba ka lama jong ka UDP kan kaweh kylleng ka jylla ha u 2023.
U ong ruh ba kawei pat ka daw kaba u rung sha ka UDP kadei namar u ïohi ba kane ka party ka buh hakhmat eh ïa ka bha ka miat jong ki paradoh para snam jong ki khun ka Bri u Hynñiewtrep. U kyntu ruh ïa ki nongkyrshan ka party na Mylliem ba kin pynduh noh ïa ka mynsiem ban ia shet para Khasi hynrei ban sdang noh ka jingkhie rasong biang jong ka UDP.
Na ka liang u Bah Paul Lyngdoh, Working President ka party u la ong ba baroh shi katta, ïa ka bor synshar ha ka jylla la shu aiwai beit ha ki party kiba dei na shabar jylla.
“Na ki 50 snem ka por kaba kham bun ngi la aiwai ka bor synshar ha ki party kiba na shabar naduh Delhi, Allahabad bad la ïawad ruh mynta naduh Gujarat ban wan bad ong sngewbha pynpeit lem ïa ka synshar khadar ha kane ka jylla,” u la ong da kaba pynpaw ba kane hi ka la pyniap noh ïa ka jingïakhun borbah ki longshwa manshwa kiba 60, 70 snem mynshwa kiba ïakhun bad ïaksaid ban ïoh ïa la ka jong ka jylla lajong.
U ong ruh ba mynta ka jylli ka la dap biang ban pynphai biang ïa ka shalyntem ha ka synshar khadar kumba la lamkhmat ha ki 50 snem mynshwa da ki party trai ri.
Hadien ba la dep ban pdiang burom ia u Bah Mitchel sha ka party, na ka liang u Bah Metbah u la ong ba dalade hi u la wan khnang ha kane ka sngi ban ïa kynduh bad ai mynsiem ïa ki nongïalam bad ki nongtrei jong ka party na Mylliem constituency kiba dei ki nongïakhun ba hakhmat eh bad ki ban duh thiah duh dem ha ka por elekshon.
“Phi long u MDC ka NPP hynrei phi la shim ïa ka rai ban rung noh sha ka party UDP, nga ngeit skhem ba ka don ka daw ba phi da pynshong nongrim balei phi kwah ban rung sha ka party jongngi,” la bynrap biang u President.
U la kyntu ruh ïa ki nongkitkam ba kim dei satia ban ailad ba ka mynsiem ïa shrut ne knieh kam president hynrei ban trei beit kum ka kynhun haduh kaba kut. Da kaba ïaroh ïa ka rukom treikam jong ka UDP Mylliem, u Bah Metbah u la ong, “Kane keiñ kadei ka rukom treikam. Namar lada ïa bun eh ba knieh long nongïalam kata kaba jynjar, uwei ruh kwah long president, uwei ruh u kwah bad sa uwei ruh u kwah, katno ngut yn ïa thung president. Ka long ka kam kaba eh bha. Kumta, uwei uba la jied da uba bun balang kata ka la biang. Don ruh ki jingjia ba kiba bun balang kim kwah hynrei kwah jubor justi beit ban long manga.”
Nalorkata, u ong ruh ba ka jingjop jong uno uno u nongialam ne u nongmihkhmat kadei eh ha ka jingtrei bad ka jingsngewthuh jingmut jong ki nongïalam kumba ki don khrui ha katei ka sngi.
Ha kane ka sngi la ïoh ruh ïa ka jingkren na ki nongïalam ka party kynthup naduh u Bah Jemino Mawthoh, Bah Jambor War MDC ka Mawthadraishan, Bah Nujorki Sungoh MLA ka Mowkaiaw, Kong Pretty Kharpyngrope, President ka UDP Mylliem Bah Spar Lyngdoh bad kumjuh u General Secretary ka party na Mylliem Bah Bankhraw Sohtun nalor kiwei kiwei.