Shillong, Jymmang 08: Ka National Highway Authority of India (NHAI) kan sa sdang noh shen ban tei ïa ka jingkieng thymmai ha wah Umiam (Dwarksuid), kaba ïaid lyngba ka Shillong By-pass.
Ïa kane la pyntip da ki Ophisar ka NHAI hadien ka jingïalang bala pynïaid da u Symbud Myntri Rangbah ka Jylla ba khmih ïa ka Tnad PWD (Roads) Bah Prestone Tynsong, kaba long myn ha ka sngi palei bala lah.
Haba ïakren bad ki nongthoh khubor, u Bah Prestone ula ong ba ka NHAI kala dep ai ïa ka work order bad kular ban pyndep noh ïa kane ka jingkieng thymmai hapoh ka 10 bnai.
U pyntip ba hadien kane ka jingïalang, la pynbud pat da ka jingia jurip lang bala pynlong da ka NHAI myn ha ka 6 tarik Jymmang.
“Kila rai ban nym tei shuh ïa ka jingkieng thymmai halor ka jingkieng rim hynrei kan long marjan khnang ban nym thut ka leit ka wan jong ki kali” ong u Bah Prestone.
Ka jingtei ïa ka jingkieng thymmai ka dei kaba la shim rai hadien ba ka jingkieng rim kala tor bad orpait na ka jingïaid jong ki kali ba kit palat pud.
U Symbud Myntri Rangbah u pyntip ba ïa mynta, tang ki kali rit bad ki kali thylli la shah ban ïaid lyngba ka jing kieng ba don mynta.
U pyntip ruh ba ïa ka jingkieng Bailey Bridge ruh la nang pyndonkam lang mynta shipor khnang ba ki trok ba khia kin lait na ka jingwan ïaid lyngba ka nongbah Shillong.
“Ta ka daw ngi kwah ban pyndep noh ïa ka jingkieng thymmai kham kloi kat kaba lah namar ka jinghap ban ïa maramot ïa ka jingkieng Bailey haduh laisien ha ka shitaiew tang ban ïoh pyndonkam” ula bynrap.
