Shillong, Jymmang: U MLA ka Mawlai u Bah PT Sawkmie ha kane ka sngi Saitjaiñ ba la lah u la leit ban aijingïarap sha ki phra tylli ki kynhun Self Help Group (SHG) ki ba don ha ka dong Umpling Umjathang ka ba hap hapoh ka shnong Mawsiatkhnam kum ka jingsdang ban ai bai seng khnang ba kin lah ban pynïaid shakhmat ha ki jingtreikam ki jong ki.
Ha ba kren ha ka jingïalang ba la pynlong hapoh ka phyllaw jong ka skul Umjathang LP bad UP, u MLA u la ong ba ka jingseng ïa ki SHG kan ïarap shibun ha ka ban kyntiew ïa ka ïoh ka kot bad ruh ban ïa kyrshan pisa markylliang ha ba jia ki jingdonkam ba kyrkieh.U la ong ruh ba ka jingdonkam ba kongsan ha ki jingtreikam jong kine ki kynhun ka long ban don ïa ka jingiashaniah bad ka jingïasngewthuh jingmut lang kawei.
Nalor kata u la pynpaw ruh sha ka kynhun SHG jong ki kynthei hapoh kane ka dong ki ba don baroh kumba shispah ngut ei ei ba u long u ba kloi ban ai ïa ka jingïatreilang bad ban ïarap ha ka ba ïadei bad ki jingdonkam ki jong ki.U la kyntu ruh ïa ki ba kim dei ban lehraiñ ban pyntip sha u halor ki jingeh ki ba ki ïakynduh namar u dei u nongmihkhmat u jong ki bad ba ki lah ruh ban shu phone ha kano kano ka por.
Ha ka juh ka por u la kyntu ruh na ka bynta ban ai biang ka jingkyrshan na ka bynta jong u khnang ba un ïoh biang ïa ka jingjop ha kane ka ilekshon MLA ka ban wan ha u 2023, bad khnang ba un nang lah ban leh bad ban ïarap kham bha shuh shuh na ka bynta jong ki.
Kumjuh ha ka ba ïadei bad kane ka skul hapoh kane ka dong, u MLA u la ong kumba u la ju ïarap naduh kine ki snem ki ba la leit noh, kumta ruh u la ïarap biang ban pynkha ïa ki kamra klas khnang ba kan long ka jingmyntoi ka ba khraw na ka bynta ki khynnah skul.
Na ka liang u headmas ter jong kane ka skul u Bah S.Kharbuki ha ka jingkren u la ai ka jingïaroh ïa u MLA ka thain u ba la ïarap shibun na ka bynta kane ka skul naduh kine ki snem ki ba la leit noh kat haduh mynta.
U la pynpaw ruh sha ki SHG da ka ba ong ki long ki ba donbok shibun ban ïoh ïa u ba kum une u MLA u ba kloi ban ïarap bad ban shimkhia na ka bynta ki jingeh ki jong ki. U la ai khublei kyrpang ruh ha ka ba ïadei bad ka jingiarap ha ka ban pynkha ïa ki artylli ki kamra klas jong kane ka skul.
Shuh shuh u la ong ba ki nongshong shnong jong kane ka thaiñ mynta ki la suk shibun namar ki la lah ban leit thep vote ha kane hi ka jaka, bad kane ruh ka dei lyngba ka jingshim khia hi da une u MLA.
Ha kane ka jingïalang ba la pyniaid da u Rangbah Dong u Bah Kynsai Nongphud la ïoh ruh ki jingkren na ki nongïalam jong ki SHG ki ba la pynpaw ïa la ki jong ki jingeh ha ki jingtreikam ki jong ki.
