Mynta yn sdang ka dorbar synrai jong ka Assembly, sngewkhia ka VPP duna palat ki sngi

Shillong, Nailur 14: Ka Dorbar Synrai jong ka Meghalaya Legislative Assembly kan sdang lashai ka sngi ha ka por 10 baje mynstep. Kane ka dorbar kan long san sngi ha kaba kan kut ha ka 22 tarik mynta u bnai.
Na kine ki san sngi, lai sngi kan dei ka kam jong ka sorkar ne kata ka Government Business bad arsngi sngi pat kan dei na ka bynta ki dkhot lane kata kaba ki ong ka Private Members Business.
Ha kane ka Dorbar kin nym da bun than ki kam, namar na ka liang ka sorkar kam shym la pynkhreh kino kino ki Bill ba kan wanrah ne na ka liang ki Dkhot ruh ym shym la ïoh sngew ba kin wanrah ki Private Member’s Bill.
Hynrei ka ïingdorbar kan pyllut por ïa ki Resolution, ki Motion bad kumjuh ruh kiwei kidei de ki kam ban wanrah da ki dkhot ka Liang Pyrshah.
Kane kan dei ruh ka sien kaba nyngkong ba ka ïingdorbar, hadien jong ka elekshon MLA, ba kan don u nongïalam ka Liang Pyrshah hadien ba la thung ïa u Bah Ronnie V. Lyngdoh jong ka Congress ban long kum u Nongïalam ka Liang Pyrshah. Hynrei kan dei ruh ka sien kaba nyngkong ba ka Congress bad ka NPP kin don lang ha kajuh ka ïingdorbar hadien ba ka Congress bad ka NPP ki la ïatreilang ha ka Khasi Hills Autonomous District Council.
Na ka liang ka Seng Voice of the People Party (VPP) la sngewthuh ba ka kwah ban rah bun ki mat ban ïakren, hynrei namar ba ka Private Members ka don tang arsngi, ka Seng ka la pynpaw ba kan nym ïoh lad than ban ïakren kaba ki paidbah ki angnud. Ka Parliamentary Party (PP) jong ka VPP lyngba u Secretary, u Bah HS Kharpran, MLA ka Mawryngkneng, ka la thoh sha u Lamphang, u Thomas Sangma ban pan ban pynjlan ïa ka jingïashong dorbar sa kattao katne sngi. Tangba kam ju kham jia koit ban pynjlan na ki sngi ba la buh da ka Business Advisory Committee, lait noh satang ba kumno eh.
Haba la ïoh ban ïakren bad u Bah Ardent Miller Basaïawmoit, Chairman ka PP jong ka VPP, u la ong ba ka Seng ka la ïoh bun ki jingkyrpad na ka liang ki paidbah ban rah ha Assembly, hynrei u la pynpaw ka jingartatien ba ki saw ngut ki MLA ka Party kin ïoh ban ïakren lut namar ka jinglyngkot palat ka por shong dorbar. Wat la katta ruh, u la ong ka Seng kan rah ha ïingdorbar halor ka jingjyllei u drok ha ka jylla, ka jingshah thombor ki paidbah ha khappud, ka jingthombor bad ka jingpyndonkam palat pud ki Pulit ïa ka bor jong ki. Nangta ki MLA ka VPP kin rah ruh ïa ka jingjur ka jingdheng kali kaba la ktah bha ïa ki paidbah bad kiwei kiwei de ki mat.
Na ka liang u MLA ka Congress, u Bah Charles Marngar, u la ïathuh ba ki MLA ka Party ki la shong jingïalang ban ïakren halor ki mat kiba ktah ïa ka ïap ka im ki paidbah bad kiwei pat ki mat kiba ktah ïa ka roi ka par jong ka jylla.