Mynjur ka Health Department ban shna ïa ka Health Sub Centres ha Jyllep bad Mawhiang
Mawkyrwat, ‘Nailur 13: Ka Khasi Students’ Union (KSU) jong ka South West Khasi Hills District ka pynpaw ïa ka jingsngewnguh bad ka jingkhublei ïa ka tnad ka koit ka khiah jong ka sorkar Meghalaya halor ka jingshimkhia ïa ka jingeh ki paidbah ka dong ka thaiñ da kaba ai jingmynjur (approval) ban shna ïa ki ar tylli ki Health Sub Centres hapoh Mawsynram C&RD Block kata ha shnong Mawhiang bad ha Jyllep.
Ha kajuh ka por ki la ai khublei khamtam eh ïa ka Kong Ampareen Lyngdoh (Minister I/c Health & Family Welfare Department), namar ha ka jingleit ïakynduh ba khatduh jong ka seng ïa ka kong Ampareen Lyngdoh ha ka 26 tarik bnai Ïaïong, 2023 ha kaba na kiba bun ki mat ba ka seng ka la rah, ki mat ba ïa dei bad ka jingbuh ïa ka Health Sub Centre ha Jyllep bad Mawhiang ki dei kiwei ki mat kiba hakhmat.
Namarkata, ka seng ka sngewkmen shikatdei eh hadien ba ka la ïoh jingtip ba ka tnad ka Koit ka khiah jong ka jylla ba la khlieh da ka Kong Ampareen kum ka Myntri sorkar myn ha ka 08/09/2023 ki la shim ïa ka rai ban mynjur ban phah shna noh ïa kine ki ar tylli ki jaka sumar ne ki Health Sub Centre. Shuh shuh kum ka seng, ka khmih lynti ba ka sorkar kan pyndep kloi ïa ki jingdonkam ban phah shna noh ïa kine ki Sub Centre khnang ba kan long ka jingmyntoi ïa ki paidbah jong ka dong ka thaiñ hi baroh kawei.
Ka KSU South West Khasi Hills District ka kyntu ruh ïa ka kong Ampareen Lyngdoh kaba dei ka Mininster I/c Health and Family Welfare Department ban wan jurip lem ïa ki CHC bad PHC ba don ha South West Khasi Hills District bad Mawsynram bad kyntu ruh ba ka dei ban wan jurip kyrkieh khamtam ïa ka Civil Hospital ne ka 100 Bedded CHC kaba don ha South West Khasi Hills District, Mawkyrwat khnang ban lap ïa ki jingduna hapoh namar ha kane ka jaka sumar ka seng ka la dep rah teng ruh sha i ïa ki jingduna ba don hangne.
Ka seng ka kyntu ïa ka ba kan wan jurip khnang ban lap ba kane ka jaka sumar, watla ka la kham biang ban ïa kaba mynno mynno hynrei ka dang duna ha baroh ki liang khamtam ha ka jingdon jong ki nongtrei ha ki post ba donkam khamtam kum ki doctors, ki specialists bad kiwei ki post ba donkam.
Kane ka dei ka kyrwoh na u Forwardman Nongrem, President, Khasi Students’ Union (KSU) jong ka South West Khasi Hills District.