Dei ban ïa pynbeit noh ka NEHU, MCTA bad NEHUTA: Rakkam

Shillong, Nailur 07: Kumba 99 percent ki College hapoh Meghalaya ki la mynjur ban pyntreikam noh ïa ka National Education Policy (NEP) 2020 bad ka jingïakren ka dang ïaid shakhmat ban ïawer sa ïa kiwei ki College ban bud ïa kane ka juh ka lynti.
ïa kane la pyntip da u Myntri ka tnat pule puthi Rakkam A Sangma haba kylli halor ka jingïapher jingmut hapdeng u Vice Chancellor ka North Eastern Hills University (NEHU) bad ka Meghalaya College Teachers Association lem bad ka NEHU Teachers Association (NEHUTA).
“Ka NEP ka dei ka sobjek kaba ïar bha bad kane ka jingpule ba 4 snem jong ki samla pule Under Graduates ban pynïaid da ka NEHU na ka bynta baroh ki College hapoh Meghalaya bad 99 percent ki College hapoh ka jylla ki la ïaid shakhmat ban pyntreikam ïa ka NEP bad ki Classes ruh ki la sdang “ ong u Rakkam.
U Rakkam ula ïathuh ba ka sorkar jylla bad ka NEHU ki la dep ïakren bad ki Principal bad ki bor pynïaid jong ki College ban pynthikna ba ka jingpyntreikam ïa ka NEP kan ïaid beit ïaid ryntih.
Halor ka jingïapher jingmut hapdeng u VC, ka MCTA bad NEHUTA, u Myntri ula ong “Ka lawei jong ki samla pule ka kham kongsan ba ïa kiwei pat.
U Rakkam ula ïathuh ba ha ki por ba la dep, ki College ki la thoh sha ka sorkar ba kim pat kot bor ban pyntreikam ïa ka NEP bad ka sorkar jylla ruh ka la thoh sha ka NEHU ba ki College kim pat long kiba la pynkhreh hynrei hadien ba la ïathir sani bha, jan baroh ki College hapoh ka jylla ki la mynjur ban pyntreikam ïa ka NEP da kaba buh ïa ka lawei bad ka jingbha jong ki samla pule hakhmat duh.
“Hooid ki lah ban don ki jyrwit jyrwat lane ka jingïapher jingmut shimet. Ka sorkar ka kyntu bad ka kyrpad ïa ka NEHU , ïa ka MCTA bad NEHUTA ban pynbeit noh ïa kine ki kynrum kynram namar haduh mynta wat ki samla pule, ki Principal bad ki Management jong ki College kim don ka jingpyrshah ban pyntreikam ïa ka NEP” ula ong.