Shillong, Nailur 7 : Ka Directorate of Dairy Development ka la aiti ïa ki kali Kit dud bad kali ban test ïa ka dud lyngba ka NPDD, sha ki 18 tylli ki Dairy Co-operative Society ha ka jingïalang ba la pynlong ha Central Dairy Campus, Mawiong.
ïa kine ki kali la pyllait bad khaweh lama da u Myntri ka Tnad Animal Husbandry & Veterinary Bah A.L.Hek.
Haba kren ha ka jingïalang, u Myntri ula pynpaw ba ka jingpynmih dud hapoh ka Jylla ka dang dei kaba dang shu sdang, kumta ula pynshlur ïa ki briew ban trei ïa kane ka kam pynmih dud khnang ban nang lah pynkhlaiñ ïa ka jingpynmih dud bad ban lah pyndap pynbiang ïa la ki jong ki jingdonkam.
U Myntri ula khot ruh ïa ki riew shimet ba kin ïatreilang bad ka Sorkar ha ka ban lah pynmih kham bun ka dud bad ruh ban lah aikam aijam ïa ki samla.
Ha kane ka sngi, u Myntri ula aiti ruh ïa ki shabi jong kine ki kali sha kine ki Co-operative Society.
Kiwei kiba la ïadonlang ha kane ka sngi ki kynthup ïa u Dr Manjunatha C, Secretary, A.H & Veterinary Department, L S Shangpliang, Director, Dairy Development.
