Ka sorkar ka shaniah ha ki bor pyniaid jong ki College ban ia pynbeit bad ki nonghikai ba iakhih

Shillong, Nailur 7 : U Nongaibuit jongka tnad pule puthi u bah H.M Shangpliang mynta ka sngi u la ïathuh ba ka sorkar ka la dep rai ban shaniah ha ka jingstad jong ki bor pynïaid jong ki College bapher bapher ban ïa pynbeit bad kito ki nonghikai kiba ïakhih pyrshah ïa ka jingpyntreikam ïa ka National Education Policy (NEP).
“ Kine ki nonghikai kiba ïakhih pyrshah ki dei kiba la thung da ki bor pynïaid jong ki College. Kumta ngi la rai ban shaniah beit ha ka jingstad jong ki bor pynïaid kumno ba kin leh ne ïa pynbeit bad ki nonghikai namar ki don ki Managing Committee bad ki dei kine ki ban peit bad bishar ïa kane ka kam” ong u bah Shangpliang.
Ki nonghikai jong ki 22 tylli ki college ki dei kiba ïakhih pyrshah kiba don hapoh ka lama MCTA da kaba khlem shim klass ïa ki samla pule ba dang wan pule thymmai namar ki pyrshah ïa ka jingpyntreikam ïa ka NEP bad ki dawa ruh na u Vice Chancellor ka NEHU u Prof Prabha Shankar Shukla ban weng ïa ka jingpynbna ba ula pynmih ha ka 12 tarik Naitung mynta u snem.
U la ong ka jingthmu jong kane ka NEP ka long ban rah ïa ka kyrdan jingpule kham shalor bad na kata ka daw la rai ban sdang noh ban pyntreikam ha ka jylla.
“ Nga kyntu ïa kito ki paralok ki bym pat pdiang ïa ka NEP ba ngim dei ban ïalehkai bad ka lawei ki samla pule namar lada dang bud ïa ka course kaba rim kin ym oh leit pule Post Graduate hangne ne sha kiwei ki jylla ruh. Nga kyntu to ngin ïaid shakhmat ryngkat ryngkat bad kiwei ki jylla hapoh ka ri. Hooid kin don ki jingeh ha ine i por ba dang hynrei ka sorkar ka la kular ban ïarap lem ban pynbiang lut ïa ki jingdonkam baroh khnang ba yn lah beit ban pyntreikam ïa ka NEP” pynkut u bah Shangpliang.